பெரியாண்டிபாளையத்தில் இருந்து சின்ன ஆண்டிபாளையம் செல்லும் பாதை இயற்கை அமைப்பில் உயரமான பகுதியாக உள்ளது. மழை பெய்தால், ஆண்டிபாளையம் குளத்துக்கு மழைநீர் பெருக்கெடுத்து வருகிறது. சின்ன ஆண்டிபாளையம் - இடுவாய் ரோட்டில், குறுக்கு சந்து வீதிகளில் ஊராட்சியாக இருந்த போது கட்டப்பட்ட உயரம் குறைவான சாக்கடைக் கால்வாய் இன்னமும் அப்படியே உள்ளது. மக்கள் தொகை பெருகியுள்ள நிலையில், இவற்றை உயர்த்திக் கட்ட வேண்டும் என்ற எதிர்பார்ப்பு எழுந்துள்ளது.

வார்டில் பெரும்பாலான பகுதிகளுக்கு தண்ணீர் வாரம் ஒருமுறை வழங்கப்பட்டாலும், விடுபட்ட, குழாய் அமைக்காத பகுதிகளுக்கு, 12 நாட்களுக்கு ஒருமுறை தான் தண்ணீர் செல்கிறது. மறைவான, சந்து வீதிகள் நிறைய உள்ளது; தெருவிளக்கு எரிவதில்லை என புகார் செய்தால், பத்து நாட்கள் ஆனாலும் வந்து பார்ப்பதில்லை என்கின்றனர், மக்கள்.

பயன்பாட்டுக்கு வராத நுாலகம்

வார்டில், நடுநிலை, உயர்நிலை பள்ளிகள் உட்பட அரசு, தனியார் கல்வி நிறுவனங்கள் நிறைய உள்ளது. மாகாளியம்மன் கோவில் பின்புற வீதியில், காமராஜர் காலனியில் நுாலகம் கட்டப்பட்டு, பயன்பாட்டில் இருந்தது. நுாலகர் நியமித்து, புத்தகம் வழங்காததால், இரண்டு ஆண்டுக்கு முன் இழுத்து மூடப்பட்டது; பராமரிப்பு பணி மேற்கொள்ளாமல், அப்படியே காட்சி பொருளாக உள்ளது. இரவு நேரங்களில் விரும்பத்தகாத செயல்கள் நடக்கிறது; நுாலகத்தை திறந்து செயல்பட்டு கொண்டு வர முயற்சித்தால், மாணவ, மாணவியர் போட்டி தேர்வுகளுக்கு தயாராகிறவர்களுக்கு பெரும் பயனுள்ளதாக அமையும்.

சுத்தம் இல்லாத தண்ணீர் தொட்டி

குறிஞ்சி நகர் மேல்நிலை நீர்தேக்கத் தொட்டி சுற்றிலும் புதர் மண்டி காணப்படுகிறது. தண்ணீர் தொட்டிக்கு மேல் ஏறி சுத்தம் செய்ய பயன்படுத்தப்படும் ஏணி, நெடுக செடிகள் வளர்ந்துள்ளது. மாதக்கணக்கில் தண்ணீர் தொட்டி துாய்மைப்படுத்தப் படவில்லை என்பதை அங்குள்ள காட்சிகளே தெரிவிக்கிறது. அருகில் உள்ள பொதுக் கழிப்பிடத்துக்கு குறைவான அளவே தண்ணீர் சப்ளை செய்யப்படுகிறது. பயன்படுத்துவோர் எண்ணிக்கை அதிகமாக உள்ள நிலையில், தண்ணீர் போதியதாக இல்லை. இயற்கை உபாதைகளுக்கு செல்வோர் தர்மசங்கடத்துக்கு ஆளாகின்றனர். சின்னாண்டிபாளையம் - குறிஞ்சிநகர் ரோடு பேட்ஜ்ஒர்க் மேற்கொள்ளாமல் ஆங்காங்கே குழியாக உள்ளது. புதியதாக இச்சாலையில் பயணிப்பவர்கள் தடுமாறி விழுகின்றனர்.

சின்னாண்டிபாளையம் மாநகராட்சி நடுநிலைப்பள்ளி சுற்றுச்சுவர் உயரம் குறைவாக உள்ளது. கேட் உடைந்து, மாற்ற வேண்டிய நிலையில் உள்ளது. புதிய வகுப்பறை பணிகள் ஒருபுறம் நடந்தாலும், ஏற்கனவே உள்ள பழைய வகுப்பறை முன்புறம் சுவர்களில் விரிவான பராமரிப்பு பணி மேற்கொள்ளாமல், கான்கிரீட் சிமென்ட் பூச்சு பெயர்ந்து, கம்பிகள் வெளியே தெரிகிறது. பள்ளி வளாகத்துக்குள் மேல்நிலை நீர்த்தேக்க தொட்டி உள்ளது.

தொட்டியின் கீழ், உள்ள கேட்வால்வு குழியை தற்காலிகமாக ஜன்னல், தகரம் வைத்து மூடியுள்ளனர். பள்ளி குழந்தைகள் அவ்விடத்துக்கு சென்றால், ஆபத்து காத்திருக்கிறது. நடுநிலைப்பள்ளியை மாநகராட்சி அதிகாரிகள் ஆய்வு செய்ய வேண்டும். தொண்டு நிறுவனங்கள் உதவியுடன், பள்ளியில் விரிவான சீரமைப்பு பணி மேற்கொள்ள வேண்டியது அவசர, அவசியம்.

பள்ளி முன் குப்பை தொட்டி

வார்டில் குப்பை சேகரித்து வைக்க நிறைய இடங்கள் உள்ள நிலையில், பெரியாண்டிபாளையம் சுகாதார வளாகம் மற்றும் நடுநிலைப்பள்ளி முன்புறம், குளத்துப்புதுார் அரசு ஆதிதிராவிடர் நல நடுநிலைப்பள்ளி முன்புறம் தான் குப்பை தொட்டி வைக்கப்பட்டுள்ளது. அதிலும், சுகாதார வளாகம் முன் மூட்டை மூட்டையாக குப்பை இருப்பு வைக்கப்படுகிறது. இவற்றை சாப்பிட நாய்கள் பல படையெடுக்கின்றன.

வார்டில் திரும்பும் இடங்களில் எல்லாம் குப்பை தொட்டி நிறைந்திருப்பதையும், நாய்கள் நடமாட்டத்தையும் காண முடிகிறது.