மற்றொரு போராட்டத்தை சந்திக்க வேண்டியிருக்கும் ஈஸ்வரன் (மாநில ஊடக பிரிவு செயலாளர், கட்சி சார்பற்ற தமிழக விவசாயிகள் சங்கம்): விவசாயம், விசைத்தறி என, அமைதியான சூழலில் இருந்த இச்சிப்பட்டி கிராமம், திருப்பூர் மாநகராட்சி நிர்வாகத்தின் நடவடிக்கையால் போராட்டக் களமானது. மாநகராட்சியின் குப்பைகளை, 2 5 கி.மீ., தூரம் உள்ள இச்சிப்பட்டி கிராமத்துக்கு கொண்டு வந்து, மக்களை அச்சுறுத்தி, கிராமத்தை போர்க்களமாக மாற்றிய மாநகராட்சியின் செயலை கண்டிக்கிறோம். மாநகராட்சியின் குப்பைகளை மாநகராட்சி பகுதியிலேயே அழிக்காமல், விவசாயத்தை அழிக்கும் நோக்கில், கிராமப் பகுதிகளுக்கு குப்பைகளை கொண்டு வந்ததே தவறு.

பி.ஏ.பி., பாசன வசதியின்றி, மழை நீரை நம்பி வாழும் மக்களின் நிலத்தடிநீரை பாழாக்கும் முயற்சியில் மாநகராட்சி இறங்கியுள்ளது. மேலும், குப்பைகளை கொட்டுவதற்காக, போலீசார் மற்றும் அதிவிரைவு படையினரை வைத்து அடக்கு முறையை கையாண்ட மாநகராட்சியின் இந்த செயல்பாடு, தமிழக வரலாற்றிலேயே எங்கும் நடக்காதது. மக்களுக்கு பாதுகாப்பு அளிக்க வேண்டிய போலீசார், மாநகராட்சியின் குப்பைகளுக்கு பாதுகாப்பு அளிக்கின்றனர். இனி, இது போன்ற அடக்குமுறைகள் கிராமங்களில் மேற்கொள்ளப்படுமானால், 1970ம் ஆண்டு விவசாய சங்க தலைவர் நாராயணசாமி நாயுடு தலைமையில் மேற்கொள்ளப்பட்ட போராட்டத்தைப் போன்று மற்றொரு போராட்டத்தை திருப்பூர் மாவட்டம் சந்திக்க வேண்டியிருக்கும்.

காவல் துறையின் 'அராஜக ஆட்சி' செல்லமுத்து (மாநில தலைவர், உழவர் உழைப்பாளர் கட்சி): விவசாயத் தொழில் நிறைந்த கிராமப் பகுதி என்றும் பார்க்காமல், இச்சிப்பட்டி கிராமத்தில், குப்பைகள் கொட்ட வந்த மாநகராட்சி லாரியை சிறைபிடித்து, பொதுமக்கள் போராட்டத்தில் ஈடுபட்டனர். இனி குப்பைகள் கொட்டப்படாது என்று கூறிச் சென்ற மாநகராட்சி அதிகாரிகள், மறுநாள், போலீசாரை பயன்படுத்தி, அடக்குமுறையை கையாண்டு, வலுக்கட்டாயமாக குப்பைகளை கொட்ட நினைத்தது கண்டிக்கத்தக்கது.

மக்களுக்கு பாதுகாப்பு அளிக்க வேண்டிய போலீசாரின் தவறான நடவடிக்கையால், பெண் ஒருவர் கால் முறிந்தது. சமுதாயத்துக்காக போராடிவரும் திருஞானசம்பந்தம் போன்ற விவசாய சங்க நிர்வாகிகளை அடித்து துன்புறுத்தி போலீசார் கைது செய்தது வருந்தத்தக்கது. இது மக்களாட்சியா அல்லது காவல்துறையின் அராஜக ஆட்சியா என்ற கேள்வி எழுகிறது.

கிராமங்கள் என்ன குப்பை மேடா? ஈசன் முருகசாமி ( தமிழக விவசாயிகள் பாதுகாப்பு சங்கம்): திருப்பூர் கலெக்டர் அலுவலகமே குட்டைக்குள் தான் அமைந்துள்ளது. மாநகராட்சிக்கு குப்பை கொட்ட இடமில்லை எனில், அங்கு கொட்டலாமே! அதைவிடுத்து, அமைதியாக உள்ள கிராமங்களை சீர்குலைத்து, நிலத்தையும் நீரையும் கெடுக்க நினைப்பது ஏன்? மாநகராட்சி குப்பைகளை, மாநகராட்சி பகுதியில் உள்ள பாறைகுழிகளில் கொட்டுவதற்கே அங்குள்ள பொதுமக்கள் எதிர்ப்பு தெரிவிக்கின்றனர்.

எனில், எதற்காக, 25 கி.மீ., துாரத்தில் உள்ள இச்சிப்பட்டி கிராமத்தில் கொண்டுவந்து கொட்ட வேண்டும்? கிராமங்கள் இவர்களுக்கு என்ன குப்பை மேடா? திடக்கழிவு மேலாண்மையை முறையாக அமல் படுத்தாமல், அவற்றை மறைக்க வேண்டி, காவல்துறையை கொண்டு, அப்பாவி விவசாயிகள், பொதுமக்களை அடக்கி ஒடுக்க நினைப்பதை கண்டிக்கிறோம். நீரையும், நிலத்தையும், காற்றையும் மாசுபடுத்த நினைத்தால், மிகப்பெரிய போராட்டம் வெடிக்கும். ஒருபோதும் மக்கள் அடிபணிய மாட்டார்கள்.

நிரந்தர தீர்வு அவசியம் பழனிசாமி (ஒன்றிய செயலாளர், தமிழக விவசாயிகள் சங்கம்): கோடிக்கணக்கான ரூபாய் வருமானம் ஈட்டி வரும் திருப்பூர் மாநகராட்சி, குப்பை பிரச்னையை சரிவர கையாளாமல், கிராமப் பகுதிகளில் குப்பைகளைக் கொண்டு வந்து கொட்டும் நடவடிக்கையை நிறுத்திக் கொள்வது நல்லது. மாவட்ட கலெக்டர், மாநகராட்சி நிர்வாகம் இவ்விஷயத்தில் தலையிட்டு, குப்பை பிரச்னையை தமிழக அரசின் கவனத்துக்கு கொண்டு சென்று, நிரந்தர தீர்வு ஏற்படுத்த வேண்டும்.

காளம்பாளையம், நெருப்பெரிச்சல், கீரனுார் என, அடுத்தடுத்து எதிர்ப்பு கிளம்பியதை தொடர்ந்து, வேலம்பாளையம், இச்சிப்பட்டி என, பல்லடம் பகுதிக்கு குப்பை கொட்ட வந்துள்ளனர். இவ்வாறு, எங்கெல்லாம் பாறைக்குழிகள் உள்ளதோ, அவற்றிலெல்லாம் குப்பைகளை கொட்ட மாநகராட்சி முயற்சித்து வருகிறது. பல்லடம் வட்டார கிராமங்களில், குப்பைகளை கொட்டும் நடவடிக்கையை விவசாயிகள், பொதுமக்கள், சுற்றுச்சூழல் ஆர்வலர்கள் என, யாரும் ஏற்றுக்கொள்ள மாட்டோம்.