தமிழகத்தில், பல்லடம், ஈரோடு, திண்டுக்கல், நாமக்கல் உள்ளிட்ட பகுதிகளில், 10,000க்கும் மேற்பட்ட கறிக்கோழி பண்ணைகள் உள்ளன.

தினசரி, 10 லட்சம் கறிக்கோழிகள் உற்பத்தி செய்யப்பட்டு, தமிழகம் மற்றும் அண்டை மாநிலங்களுக்கு விற்பனைக்கு செல்கின்றன. பல்லடம் கறிக்கோழி ஒருங்கிணைப்பு குழு - பி.சி.சி., கறிக்கோழிகளின் கொள்முதல் விலையை நிர்ணயம் செய்கிறது.

பி.சி.சி., செயலர் சுவாதி கண்ணன் கூறியதாவது:

தற்போது சபரிமலை சீசன் ஆரம்பித்துள்ளது; பக்தர்கள் பலர் விரதம் இருப்பதால், கறிக்கோழி நுகர்வு குறைந்துள்ளது. இதனால், விற்பனை குறைந்துள்ளது. விற்பனை, 10 சதவீதம் வரை குறைந்துள்ளது. சமீப நாட்களாக, கொள்முதல் விலை, கிலோ, 90 முதல் 110 ரூபாய் வரை உள்ளது.

கிறிஸ்துமஸ் பண்டிகைக்கு பின், கறிக்கோழி விற்பனை சற்று உயர வாய்ப்புள்ளது. அதுவரை உற்பத்தியை மேலும் அதிகப்படுத்தாமல் கட்டுக்குள் வைத்துள்ளோம்.

இவ்வாறு அவர் கூறினார்.