பொதுத்தேர்வு வினாத்தாள்களை, பாதுகாப்புடன் கல்வித்துறை அலுவலகத்திலிருந்து கொண்டு வந்து, பள்ளிகளுக்கு வழங்க, கட்டுக்கோப்பு பாதுகாப்பு மையங்கள் அமைக்கப்படுகின்றன.

உடுமலை, குடிமங்கலம் மற்றும் மடத்துக்குளம் ஒன்றியத்திலுள்ள பள்ளிகளுக்கு, உடுமலை அரசு ஆண்கள் மேல்நிலைப்பள்ளி வினாத்தாள் கட்டுக்கோப்பு மையமாக உள்ளது. பிளஸ் 1, பிளஸ் 2 பொதுத்தேர்வுகள், உடுமலை கோட்டத்தில் 18 மையங்களில் நடக்கிறது.

பிளஸ் 2 தேர்வுகள் மார்ச் 1ம் தேதியும், பிளஸ் 1 பொதுத்தேர்வுகள் மார்ச் 4ம் தேதியும் துவங்குகிறது. தேர்வுக்கான ஏற்பாடுகள் அனைத்து மையங்களிலும், அடிப்படை வசதிகள் ஏற்படுத்தப்படுகின்றன.

தேர்வுக்கான விடைத்தாள்களில், மாணவர்களின் 'டாப்சீட்', இணைக்கும் பணிகளும் நிறைவு பெற்றுள்ளது. பிளஸ் 1, பிளஸ் 2 பொதுத்தேர்வுக்கான வினாத்தாள்கள், திருப்பூரிலிருந்து போலீஸ் பாதுகாப்புடன், கட்டுக்கோப்பு மையத்துக்கு கொண்டுவரப்பட்டுள்ளது.

மையத்துக்கு துப்பாக்கி ஏந்திய போலீஸ் பாதுகாப்பு போடப்பட்டுள்ளது. தவிர, பள்ளி ஆசிரியர் ஒருவரும் மைய பொறுப்பாளராக நியமிக்கப்பட்டுள்ளார்.

நடப்பாண்டில், உடுமலை சுற்றுப்பகுதி பள்ளிகளுக்கு, வினாத்தாள் எடுத்துச்செல்வதற்கும் விடைத்தாள்கள் பெறுவதற்கும் 5 வழித்தடங்கள் அமைக்கப்பட்டுள்ளன. தேர்வின் போது, உரிய பாதுகாப்புடன் தேர்வு மையங்களுக்கு வினாத்தாள் கட்டுகள் அனுப்பப்படுகின்றன.