தற்போதைய நிலவரப்படி, வளாகத்தில் உள்ள, 500க்கும் அதிகமான நிறுவனங்களில், 15 ஆயிரத்துக்கும் அதிகமான தொழிலாளர்கள் வேலை வாய்ப்பு பெற்று வருகின்றனர். கிராமப்புறங்களில் இருந்து, திருப்பூக்கு வேலைக்கு வந்து சென்ற நிலையில், பெருமாநல்லுார் அருகே அமைந்த பூங்கா, அப்பகுதியை சேர்ந்த மக்களுக்கு வாழ்வாதாரமாக மாறியிருக்கிறது.

வளாகத்திலேயே, தொழிலாளர்களுக்கு திறன் பயிற்சி் அளிக்கும் மையம், கூட்டரங்கு, குடிநீர், வடிகால் வசதியுடன் பிரமாண்டமாக அமைந்துள்ளது. அதுமட்டுமல்ல, கடந்த 10 ஆண்டுகளுக்கு மேலாக, மின்சாரத்தை சார்ந்து இயங்காமல், முழுவதும் சோலார் கட்டமைப்பு வசதியுடன் இயங்கி வருகிறது.

பின்னலாடை நிறுவனங்கள், முழு வேகத்தில் உற்பத்தி பணிகளை செய்து வந்தாலும், அதற்கு தேவையான மின்சாரத்தை, சோலார் கட்டமைப்பின் வாயிலாக பெற்று தன்னிறைவு அடைந்துள்ளனர். இந்தியாவிலேயே முதன்முதலாக அமைக்கப்பட்ட முன்மாதிரி பார்க் என்ற பெருமை பெற்ற, நேதாஜி அப்பேரல் பார்க், சோலார் உற்பத்தி மற்றும் பயன்பாட்டிலும் தன்னிறைவு பெற்ற தொழிற்பூங்காவாக முன்னேறியுள்ளது.

நேதாஜி அப்பேரல் பூங்காவின் நிர்வாகக்குழு தலைவர் ராமு தலைமையிலான குழுவினர், திருப்பூர் ஏற்றுமதியாளர்கள் சங்கத்துடன் இணைந்து சிறப்பாக நிர்வகித்து வருகின்றனர். தற்போதைய நிலவரப்படி, 3.4 மெகா வாட் திறனுள்ள சோலார் பேனல்கள் அமைத்து, முழுமையாக கட்டமைக்கப்பட்டுள்ளது.