திங்கள் முதல் வெள்ளி வரை தினமும், பள்ளி மாணவர்களுக்கு இந்த இதழ் கிடைக்கும். போட்டித்தேர்வு உட்பட பொது அறிவு சார்ந்த தேர்வுகளை எதிர் கொள்ள இந்த இதழ் உதவுவதால், இதை வாசிப்பதில் மாணவர்கள் மத்தியில் ஆர்வம் அதிகரித்து காணப்படுகிறது.

இந்தாண்டு வினாடி - வினா போட்டி, 'தினமலர்' மாணவர் பதிப்பான 'பட்டம்' இதழ்; சென்னை இன்ஸ்டிடியூட் ஆப் டெக்னாலஜி ஆகியன சார்பில் நடைபெற்று வருகிறது. இவற்றுடன், எஸ்.எஸ்.வி.எம்., கல்வி நிறுவனம் கைகோர்த்துள்ளது. சத்யா ஏஜென்சீஸ் நிறுவனம் இணைந்து நடத்துகிறது.

இதில், பங்கேற்க கோவை, திருப்பூர், நீலகிரி மாவட்டங்களில் இருந்து, 150க்கும் மேற்பட்ட பள்ளிகள் முன்பதிவு செய்துள்ளன; பள்ளிகள் தோறும் போட்டிகள் நடத்தப்படுகின்றன. பள்ளி அளவில் முதலிடம் பிடிக்கும் மாணவர்கள் இடையே அரையிறுதி போட்டி நடைபெறும்.

இதில் இருந்து எட்டு அணிகள் தேர்வு செய்யப்பட்டு, இறுதிப்போட்டி நடத்தப்பட உள்ளது. இறுதிப்போட்டியில் வெற்றி பெறும் மாணவர்களுக்கு பரிசுகள் காத்திருக்கின்றன.

அவிநாசி - சேவூர் ரோடு, கருமாபாளையம் பகுதியில் உள்ள சாந்தி வித்யாலயா மெட்ரிக்., மேல் நிலைப்பள்ளியில் வினாடி - வினா போட்டி நடத்தப்பட்டது. தகுதிச்சுற்று போட்டியில், 47 மாணவ, மாணவியர் ஆர்வமுடன் பங்கேற்றனர்.

அதிக மதிப்பெண் பெற்ற, 16 பேர், ஆங்கில அகர வரிசையில், எட்டு அணிகளாக பிரிக்கப்பட்டனர். அவர்களுக்கு இடையே வினாடி - வினா போட்டி நடத்தப்பட்டது.

மூன்று சுற்றுகளாக நடந்த போட்டியில், 'எச்' அணியில் இடம் பெற்ற, 7ம் வகுப்பு மாணவர்கள் ஜிஜூ கிருஷ்ணன், விக்ராந்த் ஆகியோர் முதலிடம் பிடித்தனர்.

போட்டியில் வெற்றி பெற்றவர்களுக்கு பள்ளி தாளாளர் மற்றும் முதல்வர் ரேணுகாதேவி, 'பட்டம்' வினாடி - வினா ஒருங்கிணைப்பாளர்கள் லோகப்பிரியா, மேரி, ராஜலட்சுமி ஆகியோர் பதக்கம் மற்றும் சான்றிதழை வழங்கினர்.