தமிழகத்தின் பல்வேறு மாவட்டங்களை சேர்ந்த பக்தர்கள் இங்கு வழிபாடு நடத்தி வருகின்றனர். கோவிலில், தீபம், பிரசாதம் மற்றும் விளையாட்டு பொருட்கள் விற்கும் கடைகள் உள்ளன. கோவிலில் விற்கப்படும் நெய் தீபம் தரமில்லாமல் இருப்பதாக பக்தர்கள் வேதனை தெரிவித்துள்ளனர்.

பக்தர்கள் கேட்கும் அளவில், ஒரு விளக்கு, இரண்டு விளக்கு என விற்பதில்லை; மொத்தமாக, ஐந்து விளக்கு, 50 ரூபாய் என்ற கட்டணத்தில் விற்கப்படுகிறது. இருப்பினும், பக்தர்கள் வாங்கி தீபம் ஏற்றிவைக்க போராட வேண்டியுள்ளது.

பக்தர்கள் கூறுகையில், 'கோவிலுக்கு வந்தால், அகல் விளக்கு ஏற்றி வைப்பது வழக்கம். கோவிலில், அதிக விலைக்கு அகல் விளக்கு விற்கின்றனர். கோவில் வருவாயை பெருக்க வேண்டுமென, இப்படி செய்கின்றனரா என்று தெரியவில்லை.

இருப்பினும், வசூலிக்கும் பணத்துக்கு ஏற்ப தரமான விளக்கு கொடுப்பதில்லை. நெய் விளக்கு என்கின்றனர். ஏற்றி வைக்க போராட வேண்டியுள்ளது; எளிதில் தீபம் பற்றுவதில்லை. விசாரித்து, உரிய நடவடிக்கை எடுக்க வேண்டும்,' என்றனர்.

கோவில் உதவி கமிஷனர் (பொறுப்பு) ரத்தினாம்பாளிடம் கேட்டபோது, ''இதுகுறித்து விசாரித்து, உரிய நடவடிக்கை எடுக்கப்படும்,'' என்றார்.