நுாலிழைகளில் துவங்கி

நனவான 'சுயராஜ்யம்'

மகாத்மா காந்தியின் 'சுயராஜ்யம்' என்ற கனவின் வடிவமே கதர். திருப்பூர், கதர் உற்பத்தியின் மையமாக திகழ்ந்த ஊர். 'சுதேசி' என்ற மந்திரத்தை ஆடையாக மாற்றி, அன்னியத் துணிகளைப் புறக்கணிக்கச் செய்த அந்தப் புரட்சி, திருப்பூரின் நுால் இழைகளில் துவங்கியது எனலாம். குடியரசு தினத்தில் முதலில் நினைவுக்கு வருவது நமது மூவர்ணக் கொடி. தேசியக் கொடிக்காகத் தன் உயிரையே ஈந்த திருப்பூர் குமரன்; ஆங்கிலேய ஆதிக்கத்தை முதன்முதலில் எதிர்த்து நின்ற கொங்கு நாட்டுச் சிங்கம் தீரன் சின்னமலை ஆகிய இரு மாபெரும் ஆளுமைகளின் வீரமும் இந்த மண்ணில் கலந்திருக்கிறது. வெள்ளைக்காரர்களை மிரள வைத்த சின்னமலையின் போர்க்குணமும், மண்டை பிளந்து சரிந்த போதும் கையில் ஏந்திய கொடியைத் தரையில் விடாத குமரனின் அர்ப்பணிப்பும் திருப்பூரின் வீர வரலாற்றின் இரு கண்கள். குடியரசு என்பது நமக்கான உரிமைகளை மீட்டெடுத்த நாள் என்றால், அந்த உரிமைக்காகத் தீரன் சின்னமலை விதைத்த புரட்சியும், திருப்பூர் குமரன் செய்த தியாகமுமே இன்றைய சுதந்திரக் குடியரசின் அடித்தளம்.

பொருளாதார எல்லை

காக்கும் உழைப்பாளிகள்

குடியரசின் உயிர்நாடியே 'மக்களால், மக்களுக்காக' என்பதுதான். திருப்பூர் என்பது, எந்த ஒரு பெருநிறுவனத்தாலும் உருவாக்கப்பட்ட ஊர் அல்ல; ஒரு சாமானியன் உழைப்பின் மூலம் உயர்ந்த நிலையை அடைய முடியும் என்ற ஜனநாயகத்தின் உன்னதக் கனவை ஒவ்வொரு நாளும் நிஜமாக்கிக் காட்டுகிறது.

ஒரு தேசம் உண்மையான குடியரசாகத் திகழ அதன் பொருளாதார இறையாண்மை மிக அவசியம். இந்தியா இன்று உலக நாடுகளிடம் கையேந்தாமல் தலைநிமிர்ந்து நிற்பதற்குத் திருப்பூர் ஈட்டித் தரும் அன்னியச் செலாவணி பிரதானக் காரணம். நாட்டின் எல்லைகளை ராணுவம் காப்பது போல, நாட்டின் பொருளாதார எல்லைகளைத் திருப்பூரின் உழைக்கும் வர்க்கம் காத்து வருகிறது. இது பொருளாதார ரீதியாக தேசம் அடைந்திருக்கும் குடியரசு மாண்பின் வெளிப்பாடாகும்.

சுயசார்பு இந்தியாவின்

பெருமிதமாக திருப்பூர்

அன்று கதர் மூலம் சுதேசிப் புரட்சியைத் தொடங்கியது; இன்று திருப்பூர் நவீனத் தொழில்நுட்பங்களைப் பயன்படுத்தி 'மேக் இன் இந்தியா' திட்டத்தின் உலகளாவிய முகமாக மாறியிருக்கிறது. உலகின் மிகச் சிறந்த ஆடை நிறுவனங்கள் அனைத்தும் இன்று திருப்பூரைத் தேடி வருவது, நமது தொழில்நுட்ப முதிர்ச்சிக்குச் சான்றாகும். வெளிநாட்டுத் தயாரிப்புகளுக்கு இணையாக, இன்னும் சொல்லப்போனால் அவற்றை விட மேலான தரத்தில் 'இந்தியத் தயாரிப்பு' என்ற முத்திரையுடன் ஆடைகளை உலகச் சந்தைக்கு அனுப்புவது, சுயசார்பு இந்தியாவின் பெருமிதமாகும்.

குடியரசுத் தத்துவம் என்பது அதிகாரம் ஒரு இடத்தில் குவியாமல் மக்களிடம் பரவுவதைக் குறிக்கும். திருப்பூரின் தொழில் அமைப்பு இதற்குச் சிறந்த உதாரணம். இங்கு ஒரு பெரிய நிறுவனம் மட்டுமே எல்லாவற்றையும் செய்வதில்லை; மாறாக ஆயிரக்கணக்கான குறு மற்றும் சிறு நிறுவனங்கள் ஒன்றிணைந்து ஒரு பெரிய இலக்கை அடைகின்றன. அதிகாரப் பரவலாக்கல் திருப்பூரை ஒரு 'ஜனநாயகத் தொழில் கூடமாக' மாற்றியுள்ளது.

வருங்காலத் தலைமுறைக்கு

வழங்க வளமான தேசம்

இந்திய அரசியலமைப்புச் சட்டம் ஒவ்வொரு குடிமகனுக்கும் இயற்கை வளங்களைப் பாதுகாக்கும் கடமையை வழங்கியுள்ளது. திருப்பூர் ஒரு காலத்தில் நீர் மாசடைதல் போன்ற சவால்களைச் சந்தித்தபோது, சாய ஆலைகள் 'ஜீரோ டிஸ்சார்ஜ்' நடைமுறையைப் பின்பற்றின. உலகிலேயே இவ்வளவு பெரிய அளவில் நீர் மறுசுழற்சி செய்யும் ஒரே தொழில் நகரம் திருப்பூர் என்பது இந்தியாவிற்குப் பெருமை. சுற்றுச்சூழலைப் பாதுகாப்பதன் மூலம் வருங்காலத் தலைமுறைக்கு வளமான தேசத்தை வழங்குவோம் என்ற குடியரசு தின உறுதிமொழியைத் திருப்பூர் செயலில் காட்டுகிறது. அனைத்து மாநிலத் தொழிலாளர்களையும் ஒரு தாய் பிள்ளைகளாக அரவணைத்துச் செல்லும் திருப்பூரின் பெருந்தன்மை, இந்திய அரசியலமைப்பு பின்பற்றும் 'சகோதரத்துவம்' மனப்பான்மைக்கான மிகச்சிறந்த உதாரணம். இங்கு மொழிகள் வேறாக இருக்கலாம்; ஆனால் உழைக்கும் வியர்வை ஒன்றுதான். இந்தியாவையே ஒரு தையல் இயந்திரத்தில் இணைத்துப் பார்க்க வேண்டுமென்றால், அது திருப்பூரால் மட்டுமே சாத்தியம்.

கடமையை மட்டுமே

இந்த மண் பேசும்

திருப்பூர் மண்ணில் பிறந்து வளர்ந்த சி.பி.ராதாகிருஷ்ணன், இன்று இந்தியாவின் துணை ஜனாதிபதியாகப் பொறுப்பு வகிப்பது நம் அனைவருக்கும் கிடைத்த மகுடம். ஒரு சாதாரணப் பின்னணியில் இருந்து உழைப்பால் உயர்ந்து, இன்று நாட்டின் இரண்டாவது உயரிய பதவியில் அமர்ந்திருக்கும் அவரது பயணம், 'எளியவரும் அரியணை ஏறலாம்' என்ற குடியரசுத் தத்துவத்தின் வெற்றியாகும்.

திருப்பூரில் சந்தை ஒழுக்கமே சட்டமாக மாறியுள்ளது. தரம், காலக்கெடு, தொழிலாளர் பொறுப்பு, சர்வதேச தரநிலைகள் — இவை அனைத்தும் எழுதப்படாத சட்டங்கள். இந்த ஒழுக்கம் இல்லையெனில், ஏற்றுமதி சாத்தியமில்லை.

குடியரசு தினம் உரிமைகளை நினைவூட்டுகிறது. ஆனால் பொருளாதாரம் கடமைகளால் தான் இயங்குகிறது. குடியரசு தினத்தின் கருத்தும் திருப்பூரின் இயல்பும் ஒரே நேர்கோட்டில் சந்திக்கின்றன. அங்கு கோஷங்களோ, காட்சிகளோ கிடையாது; உற்பத்தி மட்டும் பேசுகிறது.

திருப்பூர் மண்ணில் பிறந்து வளர்ந்த சி.பி.ராதாகிருஷ்ணன், இன்று இந்தியாவின் துணை ஜனாதிபதியாகப் பொறுப்பு வகிப்பது நம் அனைவருக்கும் கிடைத்த மகுடம். ஒரு சாதாரணப் பின்னணியில் இருந்து உழைப்பால் உயர்ந்து, இன்று நாட்டின் இரண்டாவது உயரிய பதவியில் அமர்ந்திருக்கும் அவரது பயணம், 'எளியவரும் அரியணை ஏறலாம்' என்ற குடியரசுத் தத்துவத்தின் வெற்றியாகும்.

திருப்பூரில் சந்தை ஒழுக்கமே சட்டமாக மாறியுள்ளது. தரம், காலக்கெடு, தொழிலாளர் பொறுப்பு, சர்வதேச தரநிலைகள் — இவை அனைத்தும் எழுதப்படாத சட்டங்கள். இந்த ஒழுக்கம் இல்லையெனில், ஏற்றுமதி சாத்தியமில்லை.

குடியரசு தினம் உரிமைகளை நினைவூட்டுகிறது. ஆனால் பொருளாதாரம் கடமைகளால் தான் இயங்குகிறது. குடியரசு தினத்தின் கருத்தும் திருப்பூரின் இயல்பும் ஒரே நேர்கோட்டில் சந்திக்கின்றன. அங்கு கோஷங்களோ, காட்சிகளோ கிடையாது; உற்பத்தி மட்டும் பேசுகிறது.