அமெரிக்க ஏற்றுமதி இரு மடங்காகும்

துணை ஜனாதிபதி ராதா கிருஷ்ணன் பேசியதாவது: திருப்பூரில், எதிர்கால ஏற்றுமதி என்னவாகும் என, பலருக்கும் மனக்கவலை இருக்கிறது. சாயத்தொழிலுக்கு பெரிய சோதனை வந்த போது, ஒன்றாக இணைந்து முயற்சித்து முறியடித்தோம். கருணாநிதி முதல்வராக இருந்த போது, பொது சுத்திகரிப்பு நிலையம் அமைக்க அனுமதி வழங்கினார். ஜெயலலிதாவும், எந்தனையோ முறை திருப்பூருக்கு பல்வேறு சலுகைகள் வழங்கினார். ஏற்றுமதியாளருக்கான 'டிராபேக்'கை குறைத்த போது, மத்திய அமைச்சர் சின்ஹாவை சந்தித்து சரிசெய்தோம். அதுபோன்ற பிரச்னைகள், உள்நாட்டு தலைவர்களால் தீர்வு காணும் பிரச்னையாக இருந்தன. தற்போதைய அமெரிக்க வரி உயர்வு பிரச்னை மிகப்பெரியது. அமெரிக்க அதிபர் டிரம்ப் என்ன நினைக்கிறார் என்று அவருக்கே தெரிவதில்லை. அவர் விதித்த வரியை, சிறிய தொழில் நகரமாக திருப்பூர் தாங்குமா என்று புரியவில்லை. நிச்சயமாக தாங்க முடியாது என்பது புரிகிறது; இருப்பினும், யாரும் நம்பிக்கை இழக்க வேண்டாம்.மத்திய வர்த்தகத்துறை அமைச்சர் பியூஷ் கோயலை, இதுதொடர்பாக மூன்றுமுறை சந்தித்து பேசினேன். 'பேச்சுவார்த்தை நடந்து கொண்டிருக்கிறது; பரஸ்பரம் கருத்து பரிமாற்றம் நடக்கிறது' என்று கூறினார். 'விவ சாயத்துக்கு அடுத்தபடியாக, ஜவுளித்தொழிலில்தான் உழைக்கும் மக்கள் அதிகம் உள்ளனர். உழைப்பாளர்கள் ஒருபோதும் வீண்போக மாட்டார்கள். நிச்சயம் உங்கள் முயற்சிகள் அனைத்தும் ஜவுளித்தொழிலையும், விவசாயத்தையும் காப்பாற்றும்; அமெரிக்கா முழு ஒத்துழைப்பு கொடுக்கும்' என்று அவரிடம் நம்பிக்கை தெரிவித்தேன். அமெரிக்க வரி உயர்வு பிரச்னை நமது கையில் இல்லை; இக்கட்டான சூழல் நிலவுகிறது. நமது பிரச்னையாக இருந்தால் தீர்வு கண்டிருப்போம். உழைப்பு என்றும் வீண் போகாது; அமெரிக்காவின் ஏற்றுமதி, தற்போதுள்ளதை காட்டிலும் இருமடங்காக உயரும் நாள் விரைவில் வரும், என்றார்.