பி.ஏ.பி., பாசனம், 4ம் மண்டல பாசனத்தின் கீழ் பயன்பெறும், கோவை, திருப்பூர் மாவட்டத்திலுள்ள, 94 ஆயிரத்து, 68 ஏக்கர் நிலங்களுக்கு, கடந்த ஜூலை, 27ம் தேதி திருமூர்த்தி அணையிலிருந்து நீர் திறக்கப்பட்டது.

வரும், டிச., 9 வரை, 135 நாட்களில், உரிய இடைவெளி விட்டு, 10 ஆயிரத்து, 250 மில்லியன் கனஅடி நீர் திறக்கப்படும் என அறிவிக்கப்பட்டது.

பி.ஏ.பி., பாசன திட்டத்தில், மண்டல பாசன நிலங்களுக்கு, 21 நாட்கள் நீர் திறப்பு, ஏழு நாட்கள் அடைப்பு என்ற அடிப்படையில் நீர் வழங்கப்படும்.

நடப்பாண்டு பருவ மழைகள் திருப்பதியாக பெய்து வருவதால், இடைவெளியின்றி, 4 சுற்றுக்களுக்கு நீர் தொடர்ந்து வழங்கப்பட்டது. கடந்த 20ம் தேதி, 4ம் சுற்று நிறைவு பெற்றாலும், திருமூர்த்தி அணை நீர் இருப்பு உயர்ந்து காணப்படுவதால், 5ம் சுற்றுக்கும் தொடர்ந்து நீர் வழங்க அதிகாரிகள் திட்டமிட்டிருந்தனர். இந்நிலையில், கடந்த, 13ம் தேதி, பல்லடம் வாவிபாளையம் அருகே, பி.ஏ.பி., பிரதான கால்வாய் உடைப்பு ஏற்பட்டது. இதனையடுத்து, திருமூர்த்தி அணையிலிருந்து பிரதான கால்வாயில் நீர் திறப்பு நிறுத்தப்பட்டது. தொடர்ந்து கால்வாய் கரைகள் சீரமைக்கப்பட்டது.

இரு வாரத்திற்கு பின், நேற்றுமுன்தினம் அதிகாலை முதல், திருமூர்த்தி அணையிலிருந்து மீண்டும் தண்ணீர் திறக்கப்பட்டு, நான்காம் மண்டலம், ஐந்தாம் சுற்றுக்கு பாசனத்திற்கு நீர் வழங்கப்பட்டு வருகிறது.

அதிகாரிகள் கூறுகையில், 'பிரதான கால்வாய் உடைப்பு காரணமாக, திருமூர்த்தி அணையிலிருந்து, கடந்த, 13ம் தேதி நீர் திறப்பு நிறுத்தப்பட்டது. தொடர்ந்து, விவசாயிகள் கோரிக்கை அடிப்படையில், உப்பாறு அணைக்கு, 5 நாட்கள் நீர் வழங்கப்பட்டது.

பல்லடம் அருகே உடைந்த பி.ஏ.பி.,பிரதான கால்வாய் பணி முடிந்ததையடுத்து, 14 நாட்களுக்கு பின், திருமூர்த்தி அணையிலிருந்து பிரதான கால்வாயில் நீர் திறக்கப்பட்டுள்ளது. நான்காம் மண்டலம் இறுதிச்சுற்றுக்கு நீர் வழங்கப்பட்டு வருகிறது,'என்றனர்.

அணை நிலவரம் திருமூர்த்தி அணையில் நேற்று காலை நிலவரப்படி, மொத்தமுள்ள, 60 அடியில், 54.95 அடி நீர்மட்டம் இருந்தது. மொத்த கொள்ளளவான, 1,935.25 மில்லியன் கனஅடியில், 1,718.07 மில்லியன் கனஅடி நீர் இருப்பு காணப்பட்டது.

அணைக்கு வினாடிக்கு, பாலாறு, 38, காண்டூர், 616 என, 654 கனஅடி நீர் வரத்து காணப்பட்டது. அணையிலிருந்து, பிரதான கால்வாயில், 830 கனஅடி நீர் மற்றும் தளி கால்வாய், குடிநீர், இழப்பு என, 859 கனஅடி நீர் வெளியேற்றப்பட்டிருந்தது.