திருப்பூர் மாவட்டம், 2009ல் உருவாக்கப்பட்டபோது, கோவை, ஈரோடு மாவட்ட பகுதிகள் இம்மாவட்டத்தில் இணைக்கப்பட்டன.தற்போது, திருப்பூர் மாவட்ட அளவில் தொடக்க வேளாண் கூட்டுறவு கடன் சங்கங்கள் - 182, கூட்டுறவு சிக்கன கடன் சங்கங்கள் - 26, பிரதம கூட்டுறவு பண்டகம் -- 3, மொத்த விற்பனை பண்டகம் ஒன்று உள்ளது.

மேலும், கூட்டுறவு நகர வங்கி -- 3, தொடக்க வேளாண் மற்றும் ஊரக வளர்ச்சி வங்கி -- 9, வேளாண் உற்பத்தியாளர் கூட்டுறவு விற்பனை சங்கம் -- 5, கூட்டுறவு சர்க்கரை ஆலை ஒன்று, நெசவாளர் கூட்டுறவு சங்கம் -- 40, விசைத்தறி நெசவாளர் கூட்டுறவு சங்கம் - 27, என மொத்தம் 297 சங்கங்கள் உள்ளன.

இவற்றில், 205 சங்கங்கள் கோவை மாவட்ட மத்திய கூட்டுறவு வங்கியை சேர்ந்த, 7 கிளைகளிலும், 92 சங்கங்கள் ஈரோடு மாவட்ட மத்திய கூட்டுறவு வங்கிக்குட்பட்ட, 6 கிளைகளிலும் கணக்கு வைத்து, செயல்பட்டு வருகின்றன.

திருப்பூர் மாவட்டம் தோற்றுவிக்கப்பட்டு, 17 ஆண்டுகளாகியும், இம்மாவட்டத்துக்கு தனியாக மத்திய கூட்டுறவு வங்கி இன்னும் துவக்கப்படவில்லை. அதனால், கூட்டுறவு சங்கங்களின் செயல்பாடுகள் பின்தங்கியுள்ளன.

திருப்பூர் மாவட்டத்தில் செயல்படும் அனைத்து வகையான கூட்டுறவு சங்கங்களுக்கும் நிதி ஒதுக்குதல், நிதி பயன்பாடு குறித்து ஆய்வு செய்தல், நிதி பயன்பாட்டின் மீது வசூல் நடவடிக்கையை கண்காணிப்பதில் சிக்கல் நீடிக்கிறது.

கோவை மற்றும் ஈரோடு மாவட்ட மத்திய கூட்டுறவு வங்கிகளில் இருந்து புள்ளிவிபரங்கள் பெற்று, அவற்றை தொகுத்து நடவடிக்கை மேற்கொள்வதிலும் சிரமம் ஏற்படுகிறது. அனைத்து விவசாயிகளும், கோவை, ஈரோடு மாவட்டங்களையே சார்ந்திருக்க வேண்டியுள்ளது.

தொழில் வளர்ச்சி அடைந்த மாவட்டமாக திருப்பூர் இருப்பதால், தொழில்துறைக்கு தேவையான கடன் வழங்கவும், 'டிபாசிட்' திரட்டவும், மாவட்டத்துக்கு தனியாக மத்திய கூட்டுறவு வங்கி உருவாக்க வேண்டும், என்ற கோரிக்கை பல ஆண்டுகளாக கிடப்பில் போடப்பட்டுள்ளது.

திருப்பூர் மாவட்ட விவசாயிகள் சார்பில் முதல்வருக்கு அனுப்பியுள்ள மனுவில், 'திருப்பூர் மாவட்டம் உருவாக்கப்பட்டு, பெரும்பாலான துறைகளின் மாவட்ட அளவிலான அலுவலகங்கள் உருவாக்கப்பட்டது.

ஆனால், இரு மாவட்ட மத்திய கூட்டுறவு வங்கி கிளைகளை பிரித்து, திருப்பூர் மாவட்ட மத்திய கூட்டுறவு வங்கி உருவாக்க வேண்டும், என்ற கோரிக்கை மட்டும் நிலுவையில் உள்ளது. இது குறித்து உரிய நடவடிக்கை எடுக்க வேண்டும்,' என வலியுறுத்தியுள்ளனர்.