அறிவியல் இயக்கம் சார்பில், ஒவ்வொரு ஆண்டும் ஒவ்வொரு தலைப்பு வழங்கப்பட்டு, மாணவ, மாணவியர் மத்தியில் அதுதொடர்பான ஆய்வறிக்கை பெறப்படுகிறது. மாவட்ட அளவில் தேர்வு செய்யப்படும் ஆய்வறிக்கை, மாநில அளவில் நடக்கும் போட்டியிலும், அதில் தேர்வு செய்யப்படும் ஆய்வறிக்கை, தேசிய அறிவியல் காங்கிரஸ் மாநாட்டிலும் இடம் பெறுகிறது. இந்த ஆய்வுக்கட்டுரைகள், சம்பந்தப்பட்ட துறையினரின் கவனத்தை ஈர்க்கும்.அந்த வகையில் இந்தாண்டு, அறிவியல் இயக்கத்தின் கருப்பொருள், 'நீடித்த பாதுகாப்பான நீர் மேலாண்மை' என்பது தான். அதன் துணை கருப்பொருள், 'நீர் சூழலும் பாதுகாப்பும்'; ஆய்வறிக்கையின் தலைப்பு, 'நகர்ப்புற சமவெளி சூழல் மண்டலத்தில் நீர்நிலைகளின் பங்கு' என, வழங்கப்பட்டுள்ளது. மாநிலம் முழுக்க ஏராளமான மாணவர்கள் இதுதொடர்பான ஆய்வறிக்கையை தயாரித்துள்ளனர்.இதில், திருப்பூர் அமுதா பள்ளி மாணவர்கள், ஒன்றோடொன்று தொடர்புடைய நல்லாறு, நொய்யல் மற்றும் நஞ்சராயன் குளம் தொடர்பான ஆய்வுக்கட்டுரையை சமர்ப்பித்துள்ளனர்.

இதன் சாராம்சம்:* நீர் நிலைகளில் உள்ள நீரை பரிசோதனைக்கு உட்படுத்தி, அதன் தன்மை கண்டறியப்பட வேண்டும். நல்லாறு நீர்வழித்தடத்தில், நிலத்தடி நீர்மட்டத்தில் ஏற்படும் மாற்றம் கண்டறியப்பட வேண்டும்.* நொய்யல் மற்றும் நல்லாறு ஆக்கிரமிப்புகளின் முழு பட்டியல் தயாரிக்கப்பட வேண்டும்; குளங்கள், ஆற்றுப்படுக்கைகள் துார்வாரப்பட வேண்டும். நல்லாறு நீர்வழித்தடம் தெளிவுப்படுத்தப்பட வேண்டும்.* பள்ளி, கல்லுாரி, நகரபகுதிகளில் விழிப்புணர்வு ஏற்படுத்த வேண்டும். நொய்யல் - நல்லாறு - நஞ்சராயன் உள்ளடக்கிய 'சூழலியல் வழித்தடம்' உருவாக்கப்பட வேண்டும்.* நீர்நிலைகளின் நிலை, நீரின் தன்மை உள்ளிட்ட விவரங்கள், ஆண்டு தோறும் அறிக்கையாக வெளியிடப்பட வேண்டும். அரசு, தன்னார்வ அமைப்பினர் மற்றும் கல்வி நிறுவனங்களின் அதன் பாதுகாப்பில் தங்கள் பங்களிப்பை வழங்க வேண்டும்.---

பாக்ஸ் 1

மாணவர்கள் ஆர்வம்

திருப்பூர் மாவட்டத்தில், நல்லாறு உள்ளிட்ட பிற நீர்நிலைகளின் நிலை மிக மோசமான நிலையில் தான் இருக்கிறது; நீர்நிலை சார்ந்த பல்லுயிர் சூழல் வெகுவாக பாதிக்கப்பட்டிருக்கிறது. நீர்நிலை பாதுகாப்பு தொடர்பாக, மாவட்ட அளவில், 120 பள்ளிகளை சேர்ந்த, 240 மாணவர்கள், 125 ஆய்வுக்கட்டுரைகளை சமர்ப்பித்துள்ளனர். இதில், 10 ஆய்வுக்கட்டுரைகள், மாநில போட்டிக்கு தேர்வு செய்யப்பட்டுள்ளது; இதில், நல்லாறு தொடர்பான ஆய்வுக்கட்டுரையும் ஒன்று. மாணவர்கள், தாங்கள் வசிக்கும் பகுதியில் உள்ள நீர்நிலை சார்ந்தும், அதன் மாசு, எதிர்கொண்டுள்ள பிரச்னைகள், நீரின் தன்மை உள்ளிட்ட பல விஷயங்களை சேகரித்து, கட்டுரையாக சமர்ப்பித்துள்ளனர்.

- கவுரிசங்கர், திருப்பூர் மாவட்ட செயலாளர்,தமிழ்நாடு அறிவியல் இயக்கம்

---

திருமுருகன்பூண்டி வழியாக நல்லாறு பயணிக்கிறது. அங்கு அமைந்துள்ள நல்லாற்றுப்பாலம்.