திருப்பூருக்கென பிரத்யேக நீராதாரம் இல்லாமல் போனாலும், அமராவதி அணை, திருமூர்த்தி அணையில் இருந்து வரும் நீர் மற்றும் பவானி ஆற்று நீர் வாயிலாக, திருப்பூர் நகர மற்றும் ஊரக மக்களின் குடிநீர் மற்றும் விவசாய தேவை பூர்த்தியடைந்து வருகிறது.நொய்யல், நல்லாறு, அவிநாசி சங்கமாங்குளம், தாமரைக்குளம் என, கிராமப்புறங்களில் பல நீர் வழித்தடங்களும், நுாற்றுக்கணக்கில் குளம், குட்டைகளும் உள்ளன. மழைக்காலங்களில் மட்டுமே நிரம்பி ததும்பும் குளம், குட்டைகளில் ஆண்டு முழுக்க நீர் இருப்பதில்லை; அதே போன்று நீர் வழித்தடங்களும் ஆக்கிரமிப்பால் அடைபட்டும், தடைபட்டும் கிடக்கின்றன.பல இடங்களில் நீர் நிலைகளையொட்டி, தனியார் நிலம் உள்ள நிலையில், அங்கு எவ்வித வளர்ச்சிப்பணியும் மேற்கொள்ள முடியாத நிலை ஏற்பட்டிருக்கிறது. ஆக்கிரமிப்புகளை மீட்டெடுப்பதிலும் சிக்கல் நீடிக்கிறது. இதனால் திருப்பூர் நகர மற்றும் ஊரக பகுதிகளில் நீர் வளம் என்பது, நிரந்தரமானதாக இல்லை. எனவே, வருவாய்த்துறையினர் மற்றும் நீர்வளத்துறையினர் இணைந்து, நீர் நிலைகளை மீட்டெடுக்கவும், குளம், குட்டைகளின் எல்லைகளை கண்டறிவதும், அவசியம். இதுவே, உலக தண்ணீர் தினத்துக்கு தரும் முக்கியத்துவம் எனவும் கூறலாம்.