மண்ணச்சநல்லூர்: திருச்சி அருகே ஆம்னி பஸ்கள் நேருக்கு நேர் மோதிய விபத்தில், புதுச்சேரியைச் சேர்ந்த பெண் உட்பட இருவர் பலியாயினர். இவ்விபத்தில் புதுச்சேரியைச் சேர்ந்த 37 பேர் படுகாயம் அடைந்தனர்.தூத்துக்குடியில் இருந்து சென்னைக்கு அஜீத் டிராவல்ஸ் என்ற தனியார் ஆம்னி பஸ் நேற்று முன்தினம் கிளம்பியது. பஸ்ஸை நெல்லையை சேர்ந்த ராஜன் (32) என்பவர் ஓட்டினார்.திருச்சியை அடுத்த சமயபுரம் பள்ளிவிடை அருகே நள்ளிரவு ஒரு மணியளவில், டிரைவரின் கட்டுப்பாட்டை இழந்த பஸ், சாலையின் நடுவில் உள்ள தடுப்புக்கட்டையில் மோதி இடதுபுறம் சென்றது.எதிரே வந்த, புதுச்சேரியில் இருந்து பழனிக்கு சுற்றுலா சென்ற கார்த்திகேயன் என்ற டூரிஸ்ட் பஸ் மீது பயங்கரமாக மோதியது. விபத்தில் இரண்டு பஸ்களும் சாலையில் இருந்து 25 அடி பள்ளத்தில் கவிழ்ந்தன.விபத்தில், புதுச்சேரியை சேர்ந்த சுபாஷிணி (22), குரும்பாபேட்டையை சேர்ந்த திலீப் பரத் (12) இருவரும் சம்பவ இடத்திலேயே உயிரிழந்தனர். புதுச்சேரியை சேர்ந்த ராஜேஷ், மஞ்சுளா, லட்சுமி, கல்யாணி, ஸ்ரீதர் உள்பட 37 பேர் படுகாயமடைந்தனர்.தூத்துக்குடியில் இருந்து சென்னை சென்ற ஆம்னி பஸ்ஸில் ஒரு சிலருக்கு மட்டுமே லேசான காயம் ஏற்பட்டது.