திண்டிவனம் அடுத்த வெள்ளிமேடுபேட்டையில், ஒலக்கூர் மேற்கு ஒன்றிய தி.மு.க., செயல்வீரர்கள் ஆலோசனைக் கூட்டம், ஒன்றிய அவைத் தலைவர் அமராவதி தலைமையில் நடந்தது.

கூட்டத்தில் அமைச்சர் மஸ்தான் பேசுகையில், 'முதல்வர் ஸ்டாலின், வரும் 2026ம் ஆண்ட சட்டசபை தேர்தலில் தி.மு.க., கூட்டணி 200 தொகுதிகளுக்கு மேல் வெற்றி பெற வேண்டும். பாராளுமன்ற தேர்தலில் 40க்கு 40 தொகுதி வெற்றி பெற்றது போல், வரும் சட்டசபை தேர்தலிலும் 234 தொகுதிகளிலும் தி.மு.க.,கூட்டணியே வெற்றி பெற வேண்டும்.

தி.மு.க.,வை எந்த கொம்பானாலும் தொட்டுக் கூட பார்க்க முடியாது. தமிழ்நாட்டில் புதிய கட்சி ஆரம்பித்து போட்டியிட்டாலும், எத்தனை கட்சி கூட்டணி சேர்ந்து வந்தாலும் தி.மு.க.,கூட்டணியை யாராலும் வெல்ல முடியாது. தி.மு.க.,வை எதிர்ப்பவர்களுக்கு டிபாசிட் கூட கிடைக்காது' என்றார்.

மாவட்ட செயலாளர் சேகர், முன்னாள் எம்.எல்.ஏ.,க்கள் மாசிலாமணி, சேதுநாதன், ஒலக்கூர் ஒன்றிய சேர்மன் சொக்கலிங்கம், ஒலக்கூர் மேற்கு ஒன்றிய செயலாளர் ராஜாராம், ஒன்றிய கவுன்சிலர் அண்ணாதுரை பொதுக்குழு உறுப்பினர்கள் ரவி, சாந்தி, திருஞானசம்பந்தன், மாவட்ட கவுன்சிலர் மனோசித்ரா பங்கேற்றனர்.