சென்னை தலைநகரில் பணிபுரிபவர்களும், தென் மாவட்டத்தில் பணிபுரிபவர்களும் கடந்த 19ம் தேதி லோக்சபா தேர்தலையொட்டி ஓட்டு போடுவதற்காக சொந்த ஊர்களுக்குச் சென்றனர்.

தொடர்ந்து சனி, ஞாயிறு விடுமுறை காரணமாக 3 நாட்களுக்குப் பின் நேற்று மீண்டும் அவரவர்கள் சொந்த இடங்களுக்கு கார், பஸ், இருசக்கர வாகனங்களில் திரும்பினர்.

இதனால் திருச்சி - சென்னை சாலையிலும், சென்னை - திருச்சி சாலையிலும் பாதசாரிகள் சாலையை கடக்க முடியாத வகையில் வாகனங்களின் அணிவகுப்பு அதிகரித்து காணப்பட்டது.

விக்கிரவாண்டி டோல்கேட்டில் நேற்று மாலை 4:00 மணி முதல் சாலைகளில் இரு புறமும் வாகனங்கள் அதிகரித்ததால் கூடுதல் லேன்களை திறக்க முடியாமல் வழக்கமாக வாகனங்கள் செல்லும் 6 லேன்கள் மட்டுமே திறக்கப்பட்டிருந்தது.

இதனால் வாகனங்கள் எளிதாக டோல் பிளாசா கடக்க முடியாமல் இருபுறமும் 3 கி.மீ., துாரம் வரை அணிவகுத்து நின்றன.

நேற்று விக்கிரவாண்டி டோல் கேட்டை 55 ஆயிரம் வாகனங்கள் கடந்து சென்றன.

இது சராசரியாக செல்லும் வாகனங்களை விட 30 ஆயிரம் வாகனங்கள் அதிகம் என்பது குறிப்பிடத்தக்கது.