திண்டிவனத்தில் இருந்து புதுச்சேரி நோக்கி நேற்று அதிகாலை டூரிஸ்ட் மினி வேன் 10க்கும் மேற்பட்டோருடன் சென்று கொண்டிருந்தது. வேனை புதுச்சேரி கொம்பாக்கத்தைச் சேர்ந்த வினோத்குமார், 35; ஓட்டினார்.

வேன் புதுச்சேரி-திண்டிவனம் சாலையில், நாவற்குளம் சாலை சந்திப்பில் சென்றபோது, முன்னால் சென்ற டிராக்டரின் பின்புறம் மோதி தலைகுப்புற கவிழ்ந்து விபத்துக்குள்ளானது.

இந்த விபத்தில் வேன் மற்றும் டிராக்டர் முன்பக்கம் நொறுங்கியது.

வேனில் இருந்த புதுச்சேரி சாரம் பகுதியைச் சேர்ந்த பரசு, 30; இவரது மனைவி மஞ்சு, மேற்கு வங்கத்தைச் சேர்ந்த டான்மோ, 37; ஹரிபிட்டா, 26; மினி வேன் ஓட்டுநர் வினோத்குமார், டிராக்டர் டிரைவர் மொரட்டாண்டி ராஜேஷ், 33; உட்பட 10 பேர் படுகாயமடைந்தனர்.

ஆரோவில் போலீசார் மற்றும் நெடுஞ்சாலை போலீசார் சம்பவ இடத்திற்கு சென்று, விபத்தில் சிக்கியவர்களை மீட்டு புதுச்சேரி ஜிப்மர் மருத்துவமனைக்கு அனுப்பி வைத்தனர். விபத்து குறித்து விசாரணை நடத்தி வருகின்றனர்.