திண்டிவனம், ஆர்.எஸ்.பிள்ளை தெருவைச் சேர்ந்தவர் தயாளன் மனைவி விமலா, 45. இவர் கடந்த மாதம் 23ம் தேதி நேரு வீதியில் உள்ள வங்கியில் இருந்து கடன் மூலம் பெற்ற 3 லட்சம் ரூபாயை தனது ஸ்கூட்டரின் சீட் அடியில் வைத்துக்கொண்டு வீட்டிற்கு சென்றார்.

வீட்டின் முன் ஸ்கூட்டரை நிறுத்திவிட்டு மீண்டும் வெளியே வந்து பார்த்த போது, 3 லட்சம் ரூபாய் கொள்ளை போனது தெரியவந்தது.

இதுகுறித்து திண்டிவனம் டவுன் போலீசில் அளித்த புகாரின் பேரில், போலீசார் வழக்குப்பதிந்து, விசாரணை நடத்தினர்.

அதில் 3 லட்சம் கொள்ளையடித்த நபர் பண்ருட்டியில் நடந்த திருட்டு வழக்கில் கைது செய்யப்பட்டு, பண்ருட்டி போலீசில் சிக்கி கடலுார் மத்திய சிறையில் அடைக்கப்பட்டிருந்தது தெரியவந்தது.

சிறையில் இருந்த ஆந்திரா மாநிலம், ஓஜிகுப்பம் பகுதியைச் சேர்ந்த வெங்கடேசன், 40; என்பவரை திண்டிவனம் போலீசார் கோர்ட் மூலம் கஸ்டடி எடுத்து விசாரணை நடத்தி 2 லட்சம் ரூபாயை பறிமுதல் செய்தனர்.

அதனைத்தொடர்ந்து, வெங்கடேசனை மீண்டும் கோர்ட்டில் ஆஜர்படுத்தி சிறையில் அடைத்தனர்.