பின், ஊராட்சி ஒன்றிய துவக்கப்பள்ளியில் இருந்து தனியாக உயர்நிலைப் பள்ளி உருவானது. ஊராட்சி ஒன்றிய துவக்கப்பள்ளி தொடங்கப்பட்டு 88 ஆண்டுகள் ஆகின்றன. கண்டிப்பான ஆசிரியர்கள் மற்றும் தலைமை ஆசிரியர்களின் நிர்வாகத்தின் கீழ் இப்பள்ளியில் படித்த மாணவர்கள் மாநில உயர்கல்வி அமைச்சர், பல்கலைக்கழக துணைவேந்தர் மற்றும் டாக்டர்கள், இன்ஜினியர்கள், தொழிலதிபர்கள், விளையாட்டு வீரர்கள், அரசியல்வாதிகள் என பல்வேறு துறைகளில் சாதனைகள் படைத்துள்ளனர்.

காமராஜர் ஆட்சிகாலத்தில் தொடங்கப்பட்டு இன்றைய தமிழக அரசு வரை நடத்தி வரும் மதிய உணவுத் திட்டம் உள்ளிட்ட பல்வேறு கல்வி வளர்ச்சித் திட்டங்கள், தங்கள் கல்விக்கும், வளர்ச்சிக்கும் உதவியாக இருந்ததாக இங்கு படித்த மாணவர்கள் தெரிவிக்கின்றனர். .முன்னாள் மாணவர்கள் பலர் இன்றும் பள்ளியின் வளர்ச்சிக்காக ஈடுபாட்டுடன் தங்களால் முடிந்த உதவிகளைச் செய்து வருகின்றனர் என்பது குறிப்பிடத்தக்கது.

ஆளுமை மிக்க நபர்களை

உருவாக்கிய பள்ளி

உயர்கல்வித்துறை முன்னாள் அமைச்சர் பொன்முடி, தஞ்சை தமிழ்ப்பல்கலைக் கழக முன்னாள் துணைவேந்தர் பாலசுப்ரமணியன், நெடுஞ்சாலைத்துறை முன்னாள் முதன்மைப் பொறியாளர் அமிர்தலிங்கம் உட்பட பல்வேறு ஆளுமை மிக்க நபர்களை உருவாக்கிய பள்ளி கண்டாச்சிபுரம் ஊராட்சி ஒன்றிய துவக்கப்பள்ளி. இதே பள்ளியில் படித்த நான் அரசியல், இயற்கை மற்றும் நவீன விவசாயம், தமிழ் இலக்கியம் ஆகியவற்றில் ஈடுபாட்டுடன் இருப்பதற்கு அடிப்படைக் காரணம் எங்கள் பள்ளிதான். -ரவிச் சந்திரன், முகையூர் வடக்கு ஒன்றிய தி.மு.க செயலாளர், மாவட்ட கவுன்சிலர், கண்டாச்சி புரம்.

எங்கள் ஊரில் இப்பள்ளி இருப்பதை

பெருமையாக கருதுகிறோம்

'உற்றுழி உதவியும் உறுபொருள் கொடுத்தும் பிற்றை நிலை முனியாது கற்றல் நன்றே' -என்ற புறநானுற்று வரிகளுக்கு ஏற்ப கண்டாச்சிபுரம் ஊராட்சி ஒன்றிய துவக்கப்பள்ளி பல கல்விமான்களை உருவாக்கியுள்ளது. இங்கு படித்து உயர்ந்த பதவிகளிலும், பொறுப்புகளிலும் தங்களை உயர்த்திக் கொண்ட மாணவர்களே இதற்கு சாட்சி. அகில இந்திய அளவிலும்,பல்வேறு வெளிநாடுகளிலும் வசிக்கும் திறன்மிக்க மாணவர்களை உருவாக்கிய பள்ளி என்ற வகையில் எங்களுக்கு பெருமை வாய்ந்ததாக கருதுகிறோம். -ரவிக்குமார், தொழிலதிபர், கண்டாச்சிபுரம்.

என்னுடைய வளர்ச்சிக்கு

இப்பள்ளியே முக்கிய காரணம்

கண்டாச்சிபுரம் பகுதியில் இருந்து பல மேதைகளை உருவாக்கிய துவக்கப்பள்ளி இதுவாகும். தொடக்கக் கல்வியை இந்த பள்ளியில் படித்து, எம்.ஏ., பி.எல்., முடித்து தற்போது வழக்கறிஞராக பணிபுரிந்து வருகிறேன். என்னுடைய வாழ்க்கை வளர்ச்சிக்கு முக்கிய பங்கு உண்டென்றால் அதற்கு இந்த ஆரம்ப பள்ளியே காரணமாகும். என்னைப்போல பல வழக்கறிஞர்கள் மற்றும் டாக்டர்கள், அரசியல்வாதிகள், சமூக சேவகர்களை உருவாக்கிய பள்ளி எங்கள் ஊரட்சி ஒன்றிய துவக்கப்பள்ளி. -ஏழுமலை, வழக்கறிஞர், கண்டாச்சிபுரம்.

பிறருக்கு உதவும் குணத்தை

வழங்கியது எங்கள் பள்ளி

ஒரு தலைமுறையில் பெறக்கூடிய கல்வி அறிவானது. ஏழேழு தலைமுறைக்கும் பாதுகாப்பாக அமையும். எவரும் களவாட முடியாத சொத்து என்றால் அது கல்வி மட்டும் தான் என்றார் தமிழ்நாடு முதலமைச்சர் ஸ்டாலின். அவரது வார்த்தைகளுக்கு ஏற்ப, அரசு பள்ளியில் கிடைத்த முதல் தலைமுறைக் கல்வி என்பது எங்களின் வாழ்வாதாரத்தை மேம்படுத்தியது. அது மட்டுமின்றி பிறருக்கு உதவும் குணத்தையும் வழங்கியது. தற்போது கண்டாச்சிபுரம் ஊராட்சி துணைத் தலைவராகவும், வழக்கறிஞராகவும் மக்கள் பணியாற்றிட என்னைப் போன்று பல்வேறு தரப்பான மிகப்பெரும் ஆளுமைகளையும், கல்வியாளர்களையும் உருவாக்கிய பெருமை எமது பள்ளிக்கே சாரும். -ஜீவானந்தம், வழக்கறிஞர், ஊராட்சி துணைத் தலைவர். கண்டாச்சிபுரம்.