பாதாள சாக்கடை வருமா?

விழுப்புரம் நகராட்சி 1வது வார்டு பகுதியில் ஜனகராஜ் கார்டன் மற்றும் விரிவாக்கப்பகுதி, தெய்வம் நகர், ஸ்ரீரடி சாய் நகர், கிருஷ்ணா நகர், பாபா நகர், செல்வம் நகர், ரோஜா கார்டன், ஆறுமுகம் லே-அவுட், கணபதி நகர் ஆகிய பகுதிகளில், பாதாள சாக்கடைத் திட்டம் கொண்டு வரப்படவில்லை. விராட்டிக்குப்பம் ரோடு ஆலமரம் அருகே கருமகாரிய கொட்டகை வேண்டும் என பலமுறை கோரிக்கை விடுத்தும் பலனில்லை. இதேபோல், விராட்டிக்குப்பம் ரயில்வே கேட் மற்றும் பள்ளி வாசல் அருகில் உள்ள பகுதியில் மழை காலங்களில் தண்ணீர் தேங்கி, சுகாதார சீர்கேடு ஏற்படுகிறது. பலமுறை கோரிக்கை விடுத்தும் நடவடிக்கை எடுக்கப்படவில்லை. சேகர் 1 வது வார்டு கவுன்சிலர்

கிடப்பில் போன கோரிக்கைகள்

எல்லீஸ்சத்திரம் குடிநீர் தேவை

விழுப்புரம் நகராட்சி 26 வது வார்டு பகுதிக்கு, மாம்பழப்பட்டு ரோடு பகுதியில் உள்ள போர்வெல் மூலம் குடிநீர் வழங்கப்படுகிறது. இதனை மாற்றி, எல்லீஸ் சத்திரத்தில் இருந்து விழுப்புரம் நகராட்சி பகுதிக்கு கொண்டுவரப்படும் குடிநீரை, வ.பாளையம் பகுதிக்கும் வழங்கிட வேண்டும். இந்திரா நகர் பகுதிக்கு சிறு பாலம் அமைக்க வேண்டும். பலமுறை நகர் மன்றத்தில் கோரிக்கை வைத்தும் பலனில்லை.மேலும், கண்ணையபிள்ளை தெரு, பி.கே.எஸ். நகர், அவ்வையார் தெரு ஆகிய பகுதியில் பாதாள சாக்கடைத் திட்டம் துவக்கப்படவில்லை. ஜெயபிரியா சக்திவேல் 26 வது வார்டு கவுன்சிலர்

கலெக்டருக்கு கோரிக்கை

புதுச்சேரி பை-பாஸ் சாலை அருகே உள்ள சாலமேடு வழியாக விழுப்புரம் ஜீவராஜ் நகரை இணைக்கும் முக்கிய சாலை அமைந்துள்ளது. இந்த சாலையை அரசு பஸ்கள், பள்ளி பஸ்கள், வேன்கள் மற்றும் பிற கனரக வாகனங்கள் தினமும் அதிகளவில் பயன்படுத்துகின்றன. இந்தப் பகுதியில் கழிவுநீர் பணிகள் முடிந்த பிறகும், சாலை சீரமைக்கப்படவில்லை. பாதாள சாக்கடை பள்ளங்கள் சீரமைக்கப்படாததால், கழிவுநீர் சாலையில் தேங்கியுள்ளது. இந்த வழியே செல்லும் கனரக வாகனங்கள் அடிக்கடி பள்ளத்தில் சிக்கும் நிலை ஏற்படுகிறது. இப்பகுதி சாலை மற்றும் தெருக்களை சீரமைத்திட, கலெக்டர் உரிய நடவடிக்கை எடுக்க வேண்டும். தங்கசந்தோஷ், வழக்கறிஞர் விழுப்புரம்.

பாபா நகர் மக்கள் அவதி

விழுப்புரம் விராட்டிகுப்பம் பாதை, பாபா நகரில் பாதாள சாக்கடை வாய்க்கால் அமைக்கப்பட்டுள்ளது. சாலை மற்றும் பாதையைவிட நான்கு அடி உயர்த்தி அமைந்துள்ளதால், பொதுமக்கள் அந்த பகுதியை கடந்து செல்ல முடியாமல் மிகுந்த அவதிப்படுகின்றனர். இப்பிரச்னை குறித்து நகராட்சி கமிஷ்னர் உள்ளிட்ட அதிகாரிகளுக்கு பலமுறை புகார் அளித்தும், நடவடிக்கை எடுக்கவில்லை. பாபா நகரைச் சேர்ந்த பொதுமக்களின் கோரிக்கையை ஏற்று, பிரச்னையை தீர்க்க அதிகாரிகள் உரிய நடவடிக்கை எடுக்க வேண்டும். - கந்தன், முதன்மை செயலர், மக்கள் உரிமை கழகம்