அருப்புக்கோட்டை நகராட்சி கூட்டம் தலைவர் சுந்தரலட்சுமி தலைமையில் நடந்தது. கமிஷனர் ராஜமாணிக்கம், துணைத் தலைவர் பழனிச்சாமி, துறை அதிகாரிகள், அலுவலர்கள் மற்றும் கவுன்சிலர்கள் கலந்து கொண்டனர்.

கூட்டத்தில் நடந்த விவாதங்கள் பாலசுப்பிரமணியன், (மார்க்சிஸ்ட்) : நகரில் உள்ள நீர்பிடிப்பு பகுதிகளில் உள்ள ஆக்கிரமிப்புகளை மழை காலத்திற்குள் அகற்றுங்கள். எனது 16 வது வார்டில் பாதாள சாக்கடை திட்ட பணிகளை முழுமையாக முடிக்காமல் விட்டதால் மக்கள் சிரமப்படுகின்றனர்.

டுவிங்கிளின் ஞான பிரபா, (தி.முக.,): கலைஞர் நகரில் தெருக்களில் போடப்பட்ட சிறு பாலங்கள் உடைந்து விட்டது. அதை சரி செய்யுங்கள். ரயில்வே பீடர் ரோட்டில் மின்விளக்குகள் பழுதாகி உள்ளது.

ஜெயகவிதா, (தி.மு.க) : தெருக்களில் ஆக்கிரமிப்புகளை அகற்றும் போது கவுன்சிலர்களுக்கு சொல்லி விட்டு அதன் பின் எடுங்கள்.

மீனாட்சி, (தி.மு.க) : லீலாவதி நகரில் ரோடு அமைக்க வேண்டும்.

தனலட்சுமி, (தி.மு.க) : 1 வது வார்டில் மெயின் ரோட்டில் உள்ள பாலம் சேதமடைந்து விட்டது. மக்கள் நடக்க சிரமப்படுகின்றனர் அதை சரி செய்ய வேண்டும்.

தமிழ்காந்தன், (தி.மு.க.,): நகரில் மழை முன்னெச்சரிக்கை நடவடிக்கையாக என்ன செய்துள்ளீர்கள்.

கமிஷனர் : நகரில் பிரதான வாறுகால் தூர் வாரப்பட்டுள்ளது. மேலும் பிரச்சனையாக உள்ள பகுதிகள் கண்டறியப்பட்டு சரி செய்யும் பணி நடக்கிறது.