வணிக வளாகத்திற்கு ரூ.2.5 கோடி மாநகராட்சி நிதியிலும், மீதமுள்ள ரூ.2.5 கோடி கடைகளுக்கான முன்பதிவு தொகை மூலம் திரட்டி கட்டுவதற்கு திட்டமிடப்பட்டது. வணிக வளாகம் தரைத்தளம் மற்றும் முதல் தளத்துடன் 25 ஆயிரம் சதுர அடி பரப்பளவில் 103 கடைகளுடன் கட்டப்படுகிறது. 50 சதவீதத்திற்கும் மேலான பணிகள் முடிந்த நிலையில், கடைகளை முன்பதிவு செய்ய வியாபாரிகள் ஆர்வம் காட்டாததால், நிதி இல்லாமல் ஒரு ஆண்டாக கிடப்பில் போடப்பட்டு உள்ளது.

இதனால் வணிக வளாகத்தில் மது அருந்துதல் உள்ளிட்ட பல்வேறு சமூக விரோத செயல்கள் நடைபெற்று வருவதால் மக்கள் அச்சத்தில் உள்ளனர். சிவகாசி சாத்துார் ரோட்டில் முன்புறம் அலுவலகத்தை கட்டிவிட்டு, வணிக வளாகத்தை பின்புறம் கட்டுவதால் வியாபாரிகள் கடைகளை முன்பதிவு செய்ய ஆர்வம் காட்டாததால் பங்களிப்பு நிதியின்றி பணிகள் கிடப்பில் போடப்பட்டுள்ளதாக வியாபாரிகள் தெரிவிக்கின்றனர்.

மாநகராட்சி அதிகாரிகள் இப்பிரச்னைக்கு முடிவு கண்டு விரைவில் கட்டுமான பணியை முடிக்க நடவடிக்கை எடுக்க வேண்டும்.