அருப்புக்கோட்டை நகராட்சி கூட்டம் தலைவர் சுந்தரலட்சுமி தலைமையில் நடந்தது. துணைத் தலைவர் பழனிச்சாமி, கமிஷனர் ராஜமாணிக்கம், இன்ஜினியர் அபுபக்கர் சித்திக், அலுவலர்கள் கவுன்சிலர்கள் கலந்து கொண்டனர்.

கூட்டத்தில் நடந்த விவாதங்கள்

ராமதிலகம், (அ.தி.மு.க.):திருச்சுழி ரோட்டில் தனியார் மருத்துவமனைகளின் மருத்துவ கழிவுகளை ரோடு ஓரங்களில் கொட்டுகின்றனர். பட்டாபிராமர் கோயில் அருகில் உள்ள நகராட்சி இடத்தில் பூங்கா அமைக்க வேண்டும்.

ஜெயகவிதா, (தி.மு.க.,):நகராட்சி மயானத்தில் உள்ள நிரந்தர ஆக்கிரமிப்புகளை அகற்ற நடவடிக்கை எடுக்க வேண்டும். எனது வார்டில் 19 தெருக்கள் உள்ளன புறநகர் பகுதிகளும் உள்ளன கூடுதலான தூய்மை பணியாளர்களை துப்புரவு பணிக்கு அனுப்ப வேண்டும்.

செந்தில் வேல்(தி.மு.க.): ஜோதிபுரம் பகுதியில் கழிவுநீர் ரோட்டில் ஓடுகிறது. அடிக்கடி இந்த பிரச்சனை ஏற்படுகிறது நிரந்தரமாக தீர்க்க நடவடிக்கை எடுங்கள்.

டுவின்கிளின்,(தி.மு.க.):பெரியார் நகர் மற்றும் இக்ரா ஸ்கூல் பகுதியில் புதியதாக ரோடு அமைக்க வேண்டும். மழைக்காலத்தில் சேறும் சகதியுமாக நடக்க முடியாமல் உள்ளது.

அப்துல் ரகுமான், (தி.மு.க.): ரயில்வே பீடர் ரோட்டில் உள்ள மெயின் வாறுகாலை தூர்வார நடவடிக்கை எடுக்க வேண்டும்.

மீனாட்சி, (தி.மு.க.,): நகரில் நாய்கள் தொல்லை அதிகமாக இருக்கிறது. என்றைக்கு தான் தீரும்.

பழனிச்சாமி, துணை தலைவர்: அரசுக்கு இதுகுறித்து கலெக்டர் கோரிக்கை வைத்துள்ளார். அரசு தான் முடிவு எடுக்க வேண்டும்.

சிவபிரகாசம், (தி.மு.க.):அருப்புக்கோட்டைக்கு பாதாள சாக்கடை திட்டம் புதிய பஸ் ஸ்டாண்ட் என வளர்ச்சி பணிகள் செய்து கொடுத்த வருவாய்த்துறை அமைச்சருக்கு நன்றி தெரிவிக்க வேண்டும். மேலும் சிறு விசைத்தறி தொழிலாளர்களுக்கு தொழில் வரியை ரத்து செய்ய நடவடிக்கை எடுக்க வேண்டும்.-