அருப்புக்கோட்டை நகராட்சி கூட்டம் தலைவர் சுந்தரலட்சுமி தலைமையில் நடந்தது. துணைத் தலைவர் பழனிச்சாமி, கமிஷனர் ராஜமாணிக்கம், இன்ஜினியர் அபூபக்கர் சித்திக், கவுன்சிலர்கள் மற்றும் அதிகாரிகள் கலந்து கொண்டனர்.

கூட்டத்தில் நடந்த விவாதங்கள்

பாலசுப்பிரமணியன் (மார்க்சிஸ்ட்): 16வது வார்டில் தெருக்களில் வாறுகால்கள், ரோடு அமைக்கப்பட்டது. தரமில்லாத பணியால் மழைக்கு கரைந்து விட்டது. அதிகாரிகள் வந்து ஆய்வு செய்வதும் இல்லை. ஒப்பந்ததாரர்களை கண்டிப்பதும் இல்லை. வளர்ச்சிப் பணிகளை தரமாக செய்யுங்கள்.

பழனிச்சாமி, துணைத்தலைவர் : அதிகாரிகள் வளர்ச்சி பணிகளை ஆய்வு செய்ய அறிவுறுத்தப்படும்.

முருகானந்தம், (பா.ஜ.,): திருச்சி ரோட்டில் லாட்ஜின் பின்புறம் டாஸ்மாக் கடை உள்ளது. அருகிலேயே நகர் புற ஆரம்ப சுகாதார நிலையம் இருக்கிறது. இங்கு வரும் நோயாளிகள் கர்ப்பிணிகள் சிரமப்படுகின்றனர். டாஸ்மாக் கடையை அங்கிருந்து அப்புறப்படுத்த வேண்டும்.

ஜெயகவிதா, (தி.மு.க.,): தெற்கு தெரு புற நகர் பகுதிகளில் உள்ள தெருக்களில் வாறுகால் அமைக்க வேண்டும். மழை பெய்தால் தண்ணீர் தேங்கி விடுகிறது. மக்கள் சிரமப்படுகின்றனர்.

டுவிங்கிளின் ஞான பிரபா,(தி.மு.க.,) : பெர்கின்ஸ்புரம் பகுதியில் நகராட்சிக்கு சொந்தமான இடம் உள்ளது. அங்கு சிறுவர் பூங்கா அமைக்க வேண்டும். பிரச்சனைகள் குறித்து சம்பந்தப்பட்ட பிரிவு அலுவலர்களிடம் அலைபேசியில் தொடர்பு கொண்டால் எடுப்பது இல்லை.

மீனாட்சி (தி.மு.க.,) : நகரில் தெரு நாய்களை கட்டுப்படுத்த தொடர்ந்து வலியுறுத்தி வருகிறோம். ஆண்டு 3 ஆகி விட்டது. காரணம் மட்டும் தான் சொல்லி கொண்டே இருக்கிறீர்கள். நாய்கள் பெருக்கத்தை குறைக்க உடனடியாக கருத்தடை யாவது செய்யுங்கள். இவ்வாறு விவாதங்கள் நடந்தது.