சாத்துாரில் வடக்குப் பகுதியில் அமைந்துள்ளது மரியன் ஊருணி. இந்த ஊருணி திறந்தவெளி கழிப்பிடமாகவும், சாக்கடைகழிவு நீர் கலந்து சாக்கடை ஊருணியாக மாறியது. ஊருணியை துார் வாறுவதோடு கழிவு நீர் கலப்பதை தடுத்து இங்கு மக்கள் நடைபயிற்சி மேற்கொள்ளவும் சிறுவர்களுக்கு பூங்கா அமைக்கவும் வேண்டுமென அரசுக்கு மக்கள் கோரிக்கை விடுத்தனர்.

இதனை ஏற்று கடந்த ஆட்சி காலத்தில் இங்கு சிறுவர் பூங்காவுடன் நடை பயிற்சி மேற்கொள்ள நடைமேடை அமைக்கப்பட்டது. தற்போது கரைப்பகுதியில் அமைக்கப்பட்ட நடைமேடை பகுதி முழுவதும் சேதம் அடைந்து செடிகள் முளைத்து புதர் மண்டிய நிலையில் காணப்படுகிறது.

மேலும் பூங்காவை சுற்றிலும் அமைக்கப்பட்டு இருந்த தெரு விளக்குகள் பழுதாகி உள்ளது. ஒரு சில விளக்குகள் மட்டுமே எரிந்து வரும் நிலையில் இரவு மற்றும் அதிகாலை நேரத்தில் இருள் சூழ்ந்த நிலையில் காணப்படுகிறது.

மேலும் செடிகள் வளர்ந்துள்ளதால் இவற்றில் விஷ பூச்சிகள் தஞ்சம் அடைந்துள்ளன. தற்போது மழைக்காலமாக உள்ளதால் நடைபயிற்சி மேற்கொள்பவர்கள் மிகவும் அச்சத்துடன் நடந்து செல்லும் நிலை உள்ளது. எனவே பூங்காவில் அடர்த்தியாக வளர்ந்துள்ள செடிகளை அகற்றுவதோடு நடைமேடையையும் கரையையும் சீரமைத்திட வேண்டும் என மக்கள் நகராட்சி நிர்வாகத்திற்கு கோரிக்கை விடுத்துள்ளனர்.