ராஜபாளையம்நகராட்சியில் வருவாய் ஆய்வாளராக பணிபுரிந்தவர் ராஜேந்திரன் 59. இவர் மீது வருமானத்திற்கு அதிகமாக சொத்து சேர்த்ததாக மாவட்ட லஞ்ச ஒழிப்பு துறை போலீசார் 2021ல் ஸ்ரீவில்லிபுத்துார் தலைமை குற்றவியல் நீதிமன்றத்தில் வழக்கு தாக்கல் செய்திருந்தனர். ராஜேந்திரன் மீது வழக்கு தொடர அப்போதைய நகராட்சி நிர்வாக இயக்குனரும், தற்போதைய ஊரக வளர்ச்சித்துறை கமிஷனருமான பொன்னையா துறைரீதியான அனுமதி வழங்கியிருந்தார்.

இவ்வழக்கு நேற்று தலைமை குற்றவியல் நீதிமன்றத்தில் விசாரணைக்கு வந்தது. பொன்னையா ஐ.ஏ.எஸ்., சாட்சியம் அளித்தார். அவரிடம் எதிர் தரப்பு வழக்கறிஞர் மாரியப்பன் குறுக்கு விசாரணை செய்தார். பின் விசாரணையை மே 15க்கு நீதிபதி வீரணன் ஒத்தி வைத்தார்.