விவசாயிகளிடமிருந்து நெல் கொள்முதல் செய்வதற்காக தமிழ்நாடு நுகர்பொருள் வாணிபக் கழகம் மூலம் மாவட்டத்தின் பல்வேறு இடங்களில் நேரடி கொள்முதல் நிலையங்கள் அமைக்கப்பட்டு கொள்முதல் பணிகள் மேற்கொள்வது வழக்கம். தற்போது கோடை அறுவடை தொடங்கி உள்ள நிலையில் அரசு கொள்முதல் நிலைய திறப்பு தாமதத்தால் அரசின் நிர்ணய விலையை விட மூடை ஒன்றுக்கு ரூ.200 என வியாபாரிகள் விலை நிர்ணயித்து விவசாயிகளிடமிருந்து நெல் கொள்முதல் செய்வதற்காக படையெடுத்து வருகின்றனர்.

தற்போது மேற்கு தொடர்ச்சி மலை அடிவாரம் மற்றும் தென்மேற்கு பருவ மழை துவக்கம் காரணமாக சாரல் மழை துவங்கி பெய்து வருகிறது. இதன் காரணமாக அறுவடை நெல்லை விவசாயிகள் விலை குறைவாக கேட்கும் நிலையும், ஈர நெல்லை காய வைத்து பாதுகாக்கும் வசதி இல்லாத சூழலில் குறைந்த விலைக்கு விற்கும் நிலைக்கு தள்ளப்பட்டுள்ளனர். அறுவடை நேரம் என்பதால் நெல்லை சிரமமின்றி விற்பனை செய்ய ஏற்கனவே முடிவு செய்த இடங்களில் அரசின் நேரடி கொள்முதல் நிலையம் திறப்பை விவசாயிகளின் கோரிக்கைக்கு ஏற்ப விரைந்து திறக்க வேண்டும் என எதிர்பார்த்து காத்துள்ளனர்.