அவரது அறிக்கை:

முதல்வராக ஸ்டாலின் பொறுப்பேற்ற போது, கொரோனா தொற்றின் உச்சத்தால் அசாதாரண சூழல் நிலவியது. அன்று முதல் இன்று வரைக்கும், அரசுக்கு உறுதுணையாக, 19,000 அரசு மருத்துவர்கள் உள்ளனர்.

ஆனால், அவர்கள் மீது முதல்வரின் பார்வை விழாதது வருத்தம் அளிக்கிறது. எதிர்பாராத விபத்துகள், இயற்கை பேரிடர் மட்டுமின்றி, கள்ளச்சாராய இறப்புகள் வரைக்கும், பாதிக்கப்பட்ட குடும்பத்தினருக்கு உடனடியாக முதல்வர் நிவாரணம் வழங்குகிறார்.

ஆனால், கொரோனா பேரிடரில் பணியாற்றி இறந்த அரசு டாக்டர்கள் குடும்பத்திற்கு, தி.மு.க., அரசு 10 காசு கூட நிவாரணம் தராதது வேதனையானது.

மகளிர் நலனில் முக்கியத்துவம் தரும் அரசு என்று சொல்கின்றனர்.

ஆனால், மறைந்த அரசு டாக்டர் விவேகானந்தனின் மனைவி, அரசு வேலை கேட்டு, கண்ணீருடன் முதல்வருக்கு வேண்டுகோள் விடுத்தும், அவரது கவனத்தை ஈர்க்க முடியவில்லை. இதனால், வேறு வழியின்றி நீதிமன்றத்தில் வழக்கு தொடர்ந்தார். அரசு வேலை தர வேண்டும் என சென்னை உயர் நீதிமன்றம் உத்தரவிட்ட பிறகும், இதுவரை அரசு மனம் இரங்கவில்லை.

பொதுவாக கல்லையும், கரைய வைக்க முடியும் என்பர். ஆனால், அரசின் மனசாட்சியை தட்டி எழுப்ப முடியவில்லை.

கடந்த டிசம்பரில் நடந்த சட்டசபை கூட்டத்தில், 'டாக்டர் விவேகானந்தன் மனைவிக்கு, அரசு வேலை தர வேண்டும்' என, பா.ஜ., - எம்.எல்.ஏ., வானதி வலியுறுத்தினார்.

அதற்கு அமைச்சர் சுப்பிரமணியன், 'விவேகானந்தனுக்கு இரண்டு மனைவியர். குடும்பத்தில் நிறைய பிரச்னைகள்.

'அதனால், அவரது மனைவிக்கு அரசு வேலை தர முடியவில்லை' என்ற, முற்றிலும் தவறான தகவலை தெரிவித்தார்.

தகவல் அறியும் உரிமை சட்டம் வாயிலாக, டாக்டர் விவேகானந்தனின் வாரிசு என்பதை, அவரது மனைவி திவ்யா உறுதி செய்யுள்ளார்.

எனவே, அவரது மனைவிக்கு அரசு வேலைக்கான உத்தரவை முதல்வர் ஸ்டாலின் வழங்க வேண்டும்.

இவ்வாறு அறிக்கையில் கூறியுள்ளார்.