வளிமண்டல சுழற்சி காரணமாக, தமிழகத்தின் பல்வேறு மாவட்டங்களில், சில நாட்களாக பரவலாக கனமழை பெய்து வருகிறது. தென் தமிழக நில பகுதிகள், குமரிக்கடல் உள்ளிட்ட பகுதிகளின் மீது நிலவிய வளிமண்டல கீழடுக்கு சுழற்சி, மேற்கு நோக்கி நகர்கிறது.

இது கேரள பகுதிகள், அரபிக்கடல் பகுதியில் காணப்படும் வளிமண்டல சுழற்சியுடன் இணைந்து காணப்படும். அடுத்து வரும் நாட்களில், இது வடக்கு கேரளா உள்ளிட்ட பகுதிகளை நோக்கி செல்ல வாய்ப்புள்ளது.

அதனால் கோவை, நீலகிரியில், ஒரு சில இடங்களில் இன்று மிக கனமழையும்; திருப்பூர், தேனி, திண்டுக்கல், தென்காசி, ஈரோடு, தருமபுரி, கிருஷ்ணகிரி, சேலம், நாமக்கல் மாவட்டங்களில், இன்று கனமழையும் பெய்ய வாய்ப்புஉள்ளது.

நாளை கோவை, நீலகிரி மாவட்டங்களில் ஒரு சில இடங்களில் கனமழைக்கு வாய்ப்புள்ளது. தமிழகம், புதுச்சேரியில் ஆக., 24 வரை பரவலாக மிதமான மழை பெய்ய வாய்ப்புள்ளது.

மன்னார் வளைகுடா, தென் தமிழக கடலோரபகுதிகள், குமரிக்கடல் பகுதிகளில், ஆக., 22 வரை மணிக்கு, 35 முதல் 45 கி.மீ., வேகத்திலும், இடையிடையே, 55 கி.மீ., வேகத்திலும், தென்மேற்கு, தென்கிழக்கு வங்கக்கடல், மத்தியமேற்கு, வடக்கு வங்கக்கடல் பகுதிகளில் இன்று மணிக்கு, 45 கி.மீ., வேகத்தில் சூறாவளி வீசலாம். மீனவர்கள் இப்பகுதிக்கு செல்ல வேண்டாம்.