கள்ளக்குறிச்சி கருணாபுரம் மற்றும் சுற்றுவட்டார பகுதியில் கள்ளச்சாராயம் குடித்து பாதிக்கப்பட்ட பெரியசாமி, மகேஷ், கண்ணன், முருகன், பரமசிவம், சிவராமன், ராமநாதன், ஏசுதாஸ் உள்ளிட்ட 20 பேர் ஜிப்மரில் கடந்த 19ம் தேதி அனுமதிக்கப்பட்டனர். இதில், 3 பேர் சிகிச்சை பலனின்றி உயிரிழந்தனர். மீதமுள்ள 17 பேர் சிகிச்சை பெற்று வந்த நிலையில், 6 பேர் சிகிச்சை முடிந்து வீடு திரும்பினர்.

11 பேர் தீவிர சிகிச்சை பிரிவில் அனுமதிக்கப்பட்டு சிகிச்சை பெற்று வந்தனர். நேற்று அதிகாலை 5:00 மணிக்கு, வெண்டிலேட்டர் உதவியுடன் சிகிச்சை பெற்று வந்த கள்ளக்குறிச்சி, கருணாபுரம், வெள்ளையன்மேடு தெருவைச் சேர்ந்த ஏசுதாஸ், 35; கருணாபுரம், கோட்டைமேடு ராமநாதன், 62; ஆகியோர் உயிரிழந்தனர்.

இதன் மூலம் ஜிப்மரில் சிகிச்சை பலனின்றி உயிரிழந்தோர் எண்ணிக்கை 5 ஆக உயர்ந்தது. தற்போது 9 பேர் சிகிச்சை பெற்று வருகின்றனர்.