திருப்பூர் மாவட்டம் காங்கேயத்தில் இருந்து காரைக்குடி நோக்கி அரசு பஸ் நேற்று மாலை சென்று கொண்டிருந்தது. சிவகங்கை மாவட்டம் கும்மங்குடி சமத்துவபுரம் அருகே சென்ற போது, எதிர் திசையில் காரைக்குடியில் இருந்து திண்டுக்கல் நோக்கி மற்றொரு அரசு பஸ் வந்தது.

இந்த இரண்டு பஸ்களும், கண்ணிமைக்கும் நேரத்தில் நேருக்கு நேர் பயங்கரமாக மோதிக் கொண்டன. இதில், இரண்டு பஸ்களும் பலத்த சேதமடைந்தன. இந்த கோர விபத்தில், பஸ்களின் இடிபாடுகளில் சிக்கி ஒரு பஸ்சின் டிரைவர், ஒன்பது பெண்கள் உட்பட 11 பேர் சம்பவ இடத்திலேயே பரிதாபமாக இறந்தனர்.

தகவலறிந்து மாவட்ட கலெக்டர் பொற்கொடி, எஸ்.பி., சிவபிரசாத், தாசில்தார் மாணிக்கவாசகம், டி.எஸ்.பி., செல்வக்குமார் மற்றும் போலீசார் விரைந்து மீட்பு பணிகளை மேற்கொண்டனர்.

இறந்தவர்களின் உடல்களை அடையாளம் காணும் பணி நடந்தது. இரண்டு பஸ்களிலும் பயணித்த மேலும், 40 பேர் படுகாயமடைந்தனர். அவர்கள் மீட்கப்பட்டு, சிவகங்கை, திருப்புத்துார், காரைக்குடி அரசு மருத்துவமனைகளில் சிகிச்சை பெற்று வருகின்றனர்.

திருப்புத்துார் அரசு மருத்துவமனையில் போதிய டாக்டர்கள், நர்ஸ்கள் இல்லாததால், அங்குள்ள தனியார் மருத்துவமனை டாக்டர்கள், நர்ஸ்கள் முதலுதவி சிகிச்சை அளித்து, காயமடைந்த பயணியரை அரசு மருத்துவமனைகளுக்கு அனுப்பி வைத்தனர்.

நேற்றிரவு வரை மீட்பு பணிகள் தொடர்ந்து நடந்தன. விபத்து குறித்து நாச்சியாபுரம் போலீசார் விசாரித்து வருகின்றனர்.

இதையடுத்து, சிவகங்கை அரசு மருத்துவமனையில் காயமடைந்த பயணியருக்கு சிகிச்சை அளித்த போது, பயிற்சி

தொடர்ச்சி 7ம் பக்கம்

பெண் டாக்டர் ஒருவர் மயங்கி விழுந்தார்.

இதற்கிடையில், முதல்வர் ஸ்டாலின் நேற்று வெளியிட்ட அறிக்கை:

சிவகங்கை மாவட்டம் திருப்பத்துார் அருகே நிகழ்ந்த விபத்தில் 11 பேர் இறந்த செய்தி, மிகுந்த அதிர்ச்சிக்கும், வேதனைக்கும் உள்ளாக்கி உள்ளது.

உடனடியாக மாவட்ட கலெக்டர் மற்றும் மாவட்ட பொறுப்பு அமைச்சர் பெரியகருப்பனை தொடர்பு கொண்டு, சம்பவ இடத்திற்கு சென்று, பாதிக்கப்பட்டோருக்கு, உயர்தர சிகிச்சை கிடைப்பதை உறுதி செய்யுமாறு அறிவுறுத்தி உள்ளேன்.

இவ்விபத்தில் உயிரிழந்தவர்களின் குடும்பத்திற்கு, ஆழ்ந்த இரங்கலை தெரிவித்துக் கொள்கிறேன்.

இழப்பீடு

விபத்தில் இறந்தவர்களின் குடும்பத்திற்கு, தலா 3 லட்சம்; பலத்த காயமடைந்து, மருத்துவமனையில் சிகிச்சை பெறுவோருக்கு, தலா ஒரு லட்சம்; லேசான காயமடைந்து, சிகிச்சை பெறுவோருக்கு, தலா 50 ஆயிரம் ரூபாய், முதல்வர் பொது நிவாரண நிதியில் இருந்து வழங்கப்படும்.

இவ்வாறு அறிக்கையில் கூறியுள்ளார்.