கைது செய்யப்படுவோருக்கு வழங்க சாப்பாட்டுக்கு அலையும் போலீசார்

சென்னையில், கடந்த 26 நாட்களாக இடைநிலை ஆசிரியர்கள் போராட்டத்தில் ஈடுபட்டுள்ளனர். அவர்களை தினமும் போலீசார் கைது செய்து திருமண மண்டபங்களில் அடைத்து, மாலை விடுவித்து வருகின்றனர். கைது செய்யப்படும் ஆசிரியர்களுக்கும், அவர்களுக்கு பாதுகாப்பு அளிக்கும் போலீசாருக்கும், மதிய உணவாக சாம்பார், தயிர், பிரிஞ்சி, உள்ளிட்ட சாதங்களும், மாலை நேரத்தில், டீ, காபி போன்றவையும் வழங்கப்படுகின்றன. இதற்காக, காவல் துறைக்கு தனி நிதி எதுவும் ஒதுக்கவில்லை. இதனால், போலீசார் உணவு வாங்க பெரிதும் சிரமப்படுகின்றனர். ஹோட்டல்களில் பேசி குறைந்த விலைக்கு உணவு வாங்குகின்றனர். அத்துடன் கோவில்களில் அன்னதானம் செய்வோரிடம், உணவு பெற்று பார்சல் கட்டி வழங்குகின்றனர். உணவு வழங்க முடியாத நாட்களில், கைது செய்யப்படுவோரை மதியத்திற்கு மேல் நகருக்கு வெளியில் கொண்டு சென்று விடுகின்றனர். இப்பிரச்னைக்கு அரசு தீர்வு காண வேண்டும் என போலீசார் வலியுறுத்தி உள்ளனர். போராட்டத்தில் ஈடுபடுவோரை கைது செய்து அழைத்துச் செல்ல, அரசு பஸ்கள் பயன்படுத்தபட்டு வருகின்றன.
தினமும் பஸ்களை அனுப்ப, அரசு போக்குவரத்துக் கழகங்களும் தயங்குகின்றன. சில நாட்களில் அரசு பஸ்கள் குறைவாக கிடைப்பதால், தனியார் பள்ளி நிர்வாகங்களிடம் பேசி, அவர்களின் பஸ்களை பயன்படுத்தி வருகின்றனர். அதேபோல் கைது செய்யப்படும் ஆசிரியர்களை தங்க வைக்க இடம் கிடைப்பதும் சிக்கலாகி வருகிறது. இப்பிரச்னைக்கு தீர்வு காண, போராட்டத்தில் ஈடுபடுவோரை அரசு அழைத்து பேசி, தீர்வு காண வேண்டும். இல்லையெனில் செலவுக்கு தேவையான நிதியை ஒதுக்க வேண்டும் என போலீசார் தெரிவித்தனர்.