அரசு நேற்று வெளியிட்ட அறிக்கை:

கடந்த, 2021ல் முதல்வராக ஸ்டாலின் பொறுப்பேற்ற பின், பல்வேறு திட்டங்களை துவக்கி வெற்றிகரமாக செயல்படுத்தி வருகிறார்.

அதில், மகளிர் விடியல் பயண திட்டம், பெண்களின் வாழ்வில் விளக்கேற்றும் திட்டமாக பாராட்டப்படுகிறது.

மாநில திட்டக்குழு மேற்கொண்ட ஆய்வில், ஒவ்வொரு பெண் பயணியும், மாதாந்திர செலவில், 888 ரூபாய் சேமிப்பது தெரியவந்துள்ளது.

இந்த திட்டத்தில், கடந்த அக்., 31ம் தேதி வரை, 570.86 கோடி பயண நடைகள் பெண்களால் மேற்கொள்ளப்பட்டு உள்ளன. 399 புதிய வழித்தடங்களில், 725 பஸ்கள் இதற்காக இயக்கப்படுகின்றன.

அரசாணை

கடந்த, 2021க்கு பின், 8,682 புதிய பஸ்கள் கொள்முதல் செய்யப்பட்டு, பயன்பாட்டுக்கு வந்துள்ளன.

அரசு பஸ்களில் கண்காணிப்புக் கேமரா, விரைவு பஸ்களில் பெண்களுக்கு தனியாக நான்கு இருக்கைகள், டிக்கெட் முன்பதிவுக்கு புது செயலி.

'ஆன்லைன்' முன்பதிவை ஊக்குவிக்க பரிசு திட்டம், மாநகர பஸ்களில் ஜி.பி.எஸ்., வசதி, கட்டண சலுகை டிக்கெட்டுகளை இ - சேவை மையத்தில் பெறும் வசதி, நவக்கிரக கோவில்களுக்கு சிறப்பு பஸ் உள்ளிட்டவை அறிமுகம் செய்யப்பட்டுள்ளன.

அரசு போக்குவரத்து கழகங்களில் இதுவரை, 3,959 'ஓட்டுனருடன் நடத்துனர்' பணியிடங்கள் நியமிக்கவும், 537 தொழில்நுட்ப பணியாளர்களை நிரப்பவும் அரசாணை வெளியிடப்பட்டு, அதில், ஒருவரே இரு பணிகளையும் செய்யும் திறனுள்ள, 684 ஓட்டுனருடன் நடத்துனர்கள் நியமிக்கப்பட்டு உள்ளனர்.

சென்னை பஸ் செயலிக்காக, மாநகர போக்குவரத்து கழகத்துக்கு, 'மத்திய அரசின் சிறந்த நுண்ணறிவு போக்குவரத்து அமைப்பு உடைய நகரம்' என்ற விருது வழங்கப்பட்டது.

வாட்ஸாப், இணையதளம் வாயிலாக குறைகளை தீர்க்கும் செயல் திட்டத்துக்காக, விரைவு போக்குவரத்து கழகத்துக்கு விருது மற்றும் பாராட்டு சான்றிதழ் வழங்கப்பட்டுள்ளது.

நாடு முழுதும் அரசு போக்குவரத்து கழகங்களில், விபத்தில்லாமல் பணிபுரிந்த, 42 ஓட்டுனர்களுக்கு மத்திய அரசு விருது வழங்கியதில், தமிழக ஓட்டுனர்கள், 14 பேருக்கு விருது கிடைத்துள்ளது.

சிறந்த போக்குவரத்து

பொது பஸ் போக்குவரத்து செயல் திறன்களுக்காக, இந்திய சாலை போக்குவரத்து கழகங்களின் கூட்டமைப்பு, 17 விருதுகளை வழங்கியுள்ளது. இதில், தமிழக அரசு போக்குவரத்து கழகங்கள், 16 விருதுகளை வென்று உள்ளன.

தமிழக போக்குவரத்து கழகங்கள், இந்திய அளவில் சிறந்த போக்குவரத்து நிறுவனமாக பாராட்டப்படுவதற்கு, தேசிய அளவில், 25 சதவீத விருதுகளை, தமிழகம் பெற்றுள்ளதே சான்றாகும். இவ்வாறு அதில் கூறப்பட்டுள்ளது.