காஞ்சிரம் மாவட்டம், ஸ்ரீபெரும்புதுார் அடுத்த தண்டலம், மண்ணுார் பகுதியில், 'பிரிங்க்ஸ் இண்டியா லிமிடெட்' நிறுவனம் செயல்படுகிறது. இது, வெளிநாடுகளில் இருந்து பொருட்களை இறக்குமதி செய்கிறது.

இந்த நிறுவனத்திற்கு, லண்டனில் உள்ள எச்.எஸ்.பி.சி., வங்கி சார்பில், 'சீல்' வைத்த இரு கன்டெய்னர்களில், 39,000 கிலோ எடையில், 1,305 வெள்ளி கட்டிகள், இந்தியாவிற்கு அனுப்பப்பட்டன.

அங்குள்ள, 'லண்டன் கேட்வே' துறைமுகத்தில் இருந்து, சென்னையை அடுத்த காட்டுப்பள்ளியில் உள்ள அதானி துறைமுகத்திற்கு, கடந்த மாதம் 30ம் தேதி கப்பலில் வந்து சேர்ந்தது.

கடந்த 3ம் தேதி, துறைமுகத்தின் வழக்கமான பாதுகாப்பு மற்றும் கண்காணிப்பு நடைமுறை முடித்து, காலை 8:30 மணிக்கு இரண்டு கன்டெய்னர்களும் சென்னைக்கு புறப்பட்டன.

தண்டையார்பேட்டையைச் சேர்ந்த, 'டி.எஸ்.எஸ்., டிரான்ஸ்போர்ட்' நிறுவன லாரிகளில் வெள்ளிக்கட்டிகள் ஏற்றி, அதானி துறைமுகத்தில் இருந்து, ஸ்ரீபெரும்புதுாருக்கு எடுத்து செல்லப்பட்டன.

காலை 11:30 மணிக்கு, ஸ்ரீபெரும்புதுார் கிடங்கிற்கு, கன்டெய்னர் லாரிகள் சென்றன. அங்குள்ள ஊழியர்கள், லாரிகளில் இருந்த கன்டெய்னர்களை ஆய்வு செய்தபோது, ஒரு கன்டெய்னரின், 'சீல்' உடைக்கப்பட்டு, புதிதாக சீல் வைக்கப்பட்டிருப்பது தெரிந்தது.

அந்த கன்டெய்னரை திறந்து பார்த்தபோது, 922 கிலோ எடையிலான 30 வெள்ளிக்கட்டிகள் குறைவாக இருப்பது தெரிந்தது. இவற்றின் மதிப்பு, 8.96 கோடி ரூபாய்.

இதையடுத்து, கன்டெய்னரின் உள்ளே பொருத்தப்பட்டிருந்த, 'டிராக்கிங் டிவைஸ்' ஆய்வு செய்யப்பட்டது.

அதில், கடந்த 2ம் தேதி இரவு, கன்டெய்னர்கள் துறைமுகத்தில் இருக்கும்போது, வெள்ளிக் கட்டிகள் குறைவாக இருந்த கன்டெய்னர், 16 நிமிடங்கள் திறந்து மூடப்பட்டது தெரிந்தது.

அச்சமயத்தில், வெள்ளிக் கட்டிகள் திருடப்பட்டிருப்பதாக, நிறுவன மேலாளர் தசாரி ஸ்ரீஹரி ராவ், 48, காட்டூர் காவல் நிலையத்தில் புகார் அளித்தார்.

புகாரின்படி, காட்டூர் போலீசார் வழக்கு பதிந்து, அதானி துறைமுக வளாகத்தில் உள்ள, 'சிசிடிவி' கண்காணிப்பு பணியில் இருந்த காவலாளிகள், ஊழியர்களிடம் விசாரித்து வருகின்றனர்.