உலகளாவிய பின்னலாடை ஏற்றுமதி வர்த்தகத்தில், ஒவ்வொரு ஆண்டும், புதிய கண்டுபிடிப்புகளுடன் கூடிய ஆடைகளுக்கு வரவேற்பு கிடைக்கிறது.

'ஸ்டார்ட் அப் இந்தியா' திட்டத்தில், இத்தகைய கண்டுபிடிப்புகள் ஊக்குவிக்கப்படுகின்றன. அதன்படி, திருப்பூரை சேர்ந்த சொக்கலிங்கம், வெப்பநிலை மாற்றத்தை வெளிப்படுத்தும் டி-சர்ட் அறிமுகம் செய்து உள்ளார்.

இதற்காக, செம்பருத்தி பூ, வெங்காய சருகு உள்ளிட்ட இயற்கையான பொருட்களை கொண்டு, புதிய 'இங்க்' தயாரித்து உள்ளார்.

அதைக்கொண்டு, 'பிரின்ட்' செய்து, வெப்பநிலை மாற்றத்தை கண்டறியும் 'டி-சர்ட்' வடிவமைக்கப்பட்டுள்ளது.

உடல் வெப்பநிலை, 99 டிகிரி பாரன்ஹீட்டை அடையும் போது, 'டி-சர்ட்'டில் உள்ள பிரின்டிங் வண்ணம் மாற்றம் அடைகிறது. வெப்பநிலை குறைந்த பின், மீண்டும் பழைய வண்ணத்துக்கு மாறிவிடுகிறது. குழந்தைகள், முதியவர்கள் என, அனைவரும் அணியும் போது, காய்ச்சல் பாதிப்பு ஏற்படுவதையும், குறைவதையும் கண்டறிய முடியும் என்கிறார் சொக்கலிங்கம்.

'டி-சர்ட்'டை வடிவமைத்த அவர் மேலும் கூறியதாவது:

முதன்முறையாக, 'பிங்க்' மற்றும் நீல நிறத்தில் இங்க் தயாரித்து பரிசோதித்து பார்த்துள்ளோம். மதுரையில், செப்., 28, 29ம் தேதியில் நடந்த, 'ஸ்டார்ட் அப் இந்தியா' கண்காட்சியில் பங்கேற்றோம். திருப்பூர் 'நிப்ட்-டீ' அடல் இன்குபேஷன் மையம் தான் தேவையான வழிகாட்டுதலை வழங்கியது.

பின்லாந்தில் நடக்க உள்ள கண்காட்சியில் பங்கேற்கவும் அழைப்பு விடுக்கப்பட்டுள்ளது. பல வண்ணங்களில் இத்தகைய இங்க் தயாரிக்கும் முயற்சி நடந்து வருகிறது.

கொசுவிரட்டியும் பயன்படுத்துவதால், இந்த 'டி-சர்ட்' அணிந்தால் கொசுக்கடியில் இருந்தும் தப்பலாம். இதேபோல், ஒவ்வொரு ஆண்டும், தலா மூன்று புதிய கண்டுபிடிப்புகளை அறிமுகம் செய்வதே என் நோக்கம்.

இவ்வாறு அவர் கூறினார்.