அக். 20ம் தேதி தீபாவளி பண்டிகையை முன்னிட்டு, பலரும் ஒரு மாதம் முன்பே டிக்கெட் முன்பதிவு செய்து பீஹாருக்கு பயணத்தை தொடர்ந்தனர்.இருப்பினும், தீபாவளிக்கு செல்லாதவர்கள், தேர்தலில் ஓட்டளிக்க, பீஹார் புறப்பட்டனர். அவ்வகையில், நேற்று ஜார்கண்ட் மற்றும் பீஹார் மாநிலம் வழியாக பயணிக்கும் ஆலப்புழா - தன்பாத் ரயில் உட்பட பல்வேறு வடமாநில ரயில்களில் பயணிக்க கூட்டம் அதிகரித்திருந்தது. திருப்பூர் ரயில்வே ஸ்டேஷன் பிளாட்பார்மில் ஆயிரக்கணக்கானோர் ரயிலுக்காக காத்திருந்தனர்.

ரயில், ஸ்டேஷனுக்குள் நுழைந்த உடன் 'திபுதிபுவென' பொது பெட்டி நோக்கி ஓடி, பெட்டிகளில் ஏற தொழிலாளர்கள் முயன்றனர். பெண்கள், வயதானவர்கள் என யாரும் ஒதுங்கி நிற்கவில்லை. இந்த தள்ளுமுள்ளுக்கு இடையேயும், ரயிலில் முட்டிமோதி ஏறிக்கொண்டனர்; ஒவ்வொருவர் கையிலும் துாக்க முடியாத கனமான பை வேறு இருந்தது.பீஹார் தேர்தலை ஒட்டி, கடந்த ஒரு வாரமாக அதிகமான வடமாநிலத்தவர் ரயிலில் பயணிக்க வருவதால், 30 பேர் கொண்ட போலீஸ் குழு, ஆர்.பி.எப்., அதிகாரிகள் பெட்டிக்கு ஒருவர் வீதம் நின்று, பயணிகளை வழியனுப்பி வைக்கின்றனர்.