மருத்துவம் மற்றும் பொறியியல்' படிப்புகளில் அருந்ததியர் மாணவர் சேர்க்கை உயர்வு

'மருத்துவம், பொறியியல் படிப்புகளில், அருந்ததியர் மாணவர்கள் சேர்க்கை அதிகரித்துள்ளது' என, அமைச்சர் மதிவேந்தன் கூறியுள்ளார். அவரது அறிக்கை:பட்டியலின மக்களில், மிகவும் பின்தங்கிய நிலையில் இருந்த, அருந்ததியர் சமூக மக்களுக்கான 3 சதவிகித உள் ஒதுக்கீடு, தி.மு.க., ஆட்சியில் வழங்கப்பட்டது. இதன் வாயிலாக மருத்துவம், பொறியியல் உள்ளிட்ட படிப்புகளில், அருந்ததியர் மாணவர்களின் சேர்க்கை உயர்ந்துள்ளது.கடந்த 2018-1-9ம் ஆண்டில், எம்.பி.பி.எஸ்., மாணவர் சேர்க்கையில், மொத்தம் உள்ள 3,600 இடங்களில், 107 அருந்ததியர் மாணவர்கள் சேர்ந்தனர். தி.மு.க., அரசு பொறுப்பேற்ற பிறகு, 2023-2024ம் ஆண்டில், எம்.பி.பி.எஸ்., படிப்பிற்கான மொத்த இடங்கள் 6,553 ஆக உயர்த்தப்பட்டது. இதில், 193 அருந்ததிய சமூக மாணவர்கள் சேர்ந்துள்ளனர்.
பல் மருத்துவ படிப்பில், 2018-19ல் அருந்ததியர் மாணவர்கள் சேர்க்கை 16 ஆக நிலையில், 2023-24ல், 54 ஆக உயர்ந்துள்ளது. பொறியியல் படிப்பை பொறுத்தவரை, 2009-10ம் கல்வியாண்டில், 1,193 அருந்ததியர் சமூக மாணவர்கள் சேர்ந்தனர். இது, 2023-24ல் 3,944 ஆக அதிகரித்துள்ளது. அ.தி.மு.க., ஆட்சியில், 2016-17ம் கல்வியாண்டில், பொறியியல் படிப்புகளில், அருந்ததியர் சமூக மாணவர்களின் சேர்க்கை 8.7 சதவீதமாக இருந்தது. தி.மு.க., அரசு பொறுப்பேற்ற பிறகு, 2023-2024ல் 16 சதவீதமாக உயர்ந்துள்ளது. மேலும், இதர பட்டியலின மக்களும், 84 சதவீதம் பயனடைந்து வருகின்றனர். இவ்வாறு, அதில் கூறப்பட்டுள்ளது. இதே மாதிரி நிறைய புள்ளி விபரங்களை அரசு தரப்பில் வெளியிட உள்ளனர்.