தகவல் அறியும் உரிமை சட்டத்தின் கீழ், அரசு துறைகள் தொடர்பாக தகவல் பெற, பொதுமக்கள் மனு செய்கின்றனர்.

இவ்வாறு மனு செய்யும் போது, தங்களுக்கு தேவைப்படும் தகவல் எங்குள்ளது என்பதை அறிந்து, சம்பந்தப்பட்ட துறைக்கு விண்ணப்பிக்க வேண்டும். சில சமயங்களில், பொது மக்கள் துல்லியமான விபரம் தெரியாமல், அரசு துறைகளுக்கு மனு செய்கின்றனர்.

நிராகரிப்பு

இத்தகைய மனுக்கள் வந்தால், அது தங்கள் துறை தொடர்பானது இல்லை என, மனுவை நிராகரிக்கும் நிலை காணப்படுகிறது.

இதுபோன்ற காரணங்களால், ஆர்.டி.ஐ., மனுக்களை நிராகரிக்கவோ, திருப்பி அனுப்பவோ கூடாது என, மாநில தகவல் ஆணையம் உத்தரவிட்டுள்ளது. இது தொடர்பாக, பொது தகவல் அலுவலர்களுக்கு அரசு அறிவுறுத்த வேண்டும் என்றும் ஆணையம் கூறியுள்ளது.

இது தொடர்பாக, மனிதவள மேலாண்மைத் துறை செயலர் சமயமூர்த்தி பிறப்பித்துள்ள உத்தரவு:

தகவல் அறியும் உரிமை சட்டப்படி, பொது மக்களிடம் இருந்து வரும் மனுக்களை, பொது தகவல் அலுவலர்கள் முறையாக கையாள வேண்டும். மனுவில் கோரப்படும் தகவல், தங்கள் துறையில் இல்லை என்றால், அது எந்த துறைக்கு தொடர்பானதோ, அந்த துறைக்கு மனுவை மாற்றம் செய்ய வேண்டும்.

இந்த விபரத்தை, மனுதாரருக்கும் தெரிவிக்க வேண்டும். ஒன்றுக்கு மேற்பட்ட துறைகள் தொடர்பான தகவல்கள் கேட்கப்பட்டு இருந்தால், பல்வேறு துறைகளில் இருந்து தகவல் பெற்று தொகுத்து வழங்கக்கூடாது.

எதிரானது

இவ்வாறு செய்வது நடைமுறையில் இல்லாத, புதிதாக ஒரு தகவலை உருவாக்குவதற்கு இணையானதாகும். இது, தகவல் அறியும் உரிமை சட்டத்துக்கு எதிரானதாகும்.

எனவே, இதுபோன்ற மனுக்கள் வந்தால், அந்தந்த துறையில் விண்ணப்பித்து, தகவல்களை பெற்றுக்கொள்ளும்படி, மனுதாரர்களிடம் பொது தகவல் அலுவலர்கள் தெரிவிக்க வேண்டும். இதை, பொது தகவல் அலுவலர்களுக்கு, அந்தந்த துறை தலைமை அதிகாரிகள் மற்றும் அரசு செயலர்கள் அறிவுறுத்த வேண்டும்.

இவ்வாறு அதில் கூறப்பட்டுள்ளது.