குஜிலியம்பாறை : திண்டுக்கல் மாவட்டம், குஜிலியம்பாறை அருகே வீடு கட்டும் பணிக்காக, குழி தோண்டியபோது, பூமிக்குள் புதைந்திருந்த மூன்று ஐம்பொன் சுவாமி சிலைகள் கண்டுபிடிக்கப்பட்டன. டி.கூடலூரை சேர்ந்த பாலசுப்பிரமணியன் மகன் கிருஷ்ணன், 35, கரூர்-திண்டுக்கல் ரோட்டை ஒட்டிய நத்தமேட்டு பகுதியில், வீடு கட்டுவதற்காக குழி தோண்டினார். அதில் 9 செ.மீ., உயரமுள்ள விநாயகர், அம்மன், யானை சிலைகள், இரண்டு சங்குகள், உலோகத்தால் ஆன ஒரு ஸ்டாண்ட் இருந்தது. இப்பகுதியில் பழங்காலத்தில் கட்டப்பட்ட ஈஸ்வரன் கோயில், மீனாட்சி சுந்தரேஸ்வரர் கோயில், பூவாலம்மன் கோயில்கள் அருகருகே உள்ளன.