நிலத்தடி நீர்

தமிழகத்தின் அனைத்து மாவட்டங்களிலும் நிலத்தடி நீர் மட்டம் எப்படி இருக்கிறது என்பதை நீர் வளத்துறையினர் ஆய்வு செய்கின்றனர். துறை கண்காணிப்பில் இருக்கும் கிணறுகளின் மூலம் இந்த ஆய்வு மேற்கொள்ளப் படுகிறது. இந்தாண்டு ஜூலை மாதம் மேற்கொள்ளப்பட்ட ஆய்வுகளின் படி, ஜூன் மாதத்தை காட்டிலும், 21 மாவட்டங்களில் நிலத்தடி நீர் அதிகரித்துள்ளது; 16 மாவட்டங்களில் சரிந்துள்ளது.

அதிகரிப்பு

திருவள்ளூர், காஞ்சிபுரம், திருவண்ணாமலை, வேலுார், கிருஷ்ணகிரி, விழுப்புரம், திருவாரூர், திருச்சி, புதுக்கோட்டை, சேலம், நாமக்கல், கோவை, திருப்பூர், நீலகிரி, கன்னியாகுமரி, கள்ளக்குறிச்சி, செங்கல்பட்டு, ராணிப்பேட்டை, திருப்பத்துார், மயிலாடுதுறை மாவட்டங்களில் நிலத்தடி நீர் அதிகரித்துள்ளது. அதிகபட்சமாக திருவாரூரில் 0.79 மீட்டர், நாமக்கல்லில் 0.69 மீட்டர், திருவள்ளூரில் 0.61 மீட்டர் அதிகரித்துள்ளது.

தர்மபுரி, கடலுார், தஞ்சாவூர், நாகை, பெரம்பலுார், அரியலுார், ஈரோடு, திண்டுக்கல், மதுரை, ராமநாதபுரம், சிவகங்கை, தேனி, துாத்துக்குடி, திருநெல்வேலி, விருதுநகர் மாவட்டங்களில் நிலத்தடி நீர் சரிந்துள்ளது.

வருண பகவான்

அதிகபட்சமாக, திருநெல்வேலியில், 0.71 மீட்டர், துாத்துக்குடி, பெரம்பலுார், தர்மபுரி மாவட்டங்களில் தலா 0.50 மீட்டரும், நீர் மட்டம் சரிந்துள்ளது. தமிழகத்தில் ஜூன், ஜூலை, ஆகஸ்ட், செப்டம்பர் மாதங்களில் தென்மேற்கு பருவமழை பொழியும்.

இம்மாதத்திலும் துவக்கம் முதலே மாநிலம் முழுவதும் பரவலாக மழை பெய்துள்ளது; வரும் நாட்களிலும் மழை பெய்ய வாய்ப்புள்ளதாக, வானிலை மையம் கணித்துள்ளது. 'வருண பகவான் மனது வைத்தால் தான் நீர் வளம் குறையாமல் காக்க முடியும்' என்கின்றனர், விவசாயிகள்.