அண்ணாமலையின் மற்றொரு அறிக்கை:

தொடர்ந்து, ஒவ்வொரு ஆண்டும் விவசாயிகளை காக்க வைத்து, அதன்பின் மத்திய அரசுக்கு கடிதம் எழுதுகிறோம் என்ற பெயரில் நாடகமாடி கொண்டிருக்கின்றனர். ஆண்டுதோறும் சம்பா பயிர் அறுவடை காலத்தில், பருவ மழை பெய்வதால், நெல்லின் ஈரப்பதம் அதிகரிப்பது வழக்கமான ஒன்று. இதற்கு நிரந்தர தீர்வு காண, கடந்த நான்கு ஆண்டுகளாக தி.மு.க., அரசு, எந்த நடவடிக்கையும் எடுக்கவில்லை. கடந்த ஆண்டு விவசாய பட்ஜெட்டில், 50 சதவீத மானியத்தில் நடமாடும் நெல் உலர்த்தும் இயந்திரம் வாங்க, 90 லட்சம் ரூபாய் ஒதுக்கீடு செய்வதாக அறிவித்த தி.மு.க., அரசு, அதன்பின் அதுகுறித்து பேசவே இல்லை.
நெல் உலர்த்தும் இயந்திரம் வாங்க, 50 சதவீதம் மானியம் மட்டும் கொடுத்தால், மீதமுள்ள நிதிக்கு, சிறு, குறு விவசாயிகள் எங்கே செல்வர்?ஒவ்வொரு சட்டசபை தொகுதிக்கும் தொகுதி மேம்பாட்டு நிதியாக ஆண்டுக்கு, 3 கோடி ரூபாய் ஒதுக்கீடு செய்யப்படுகிறது. டெல்டா மாவட்டங்களில் உள்ள எம்.எல்.ஏ.,க்கள் இந்த நிதியை என்ன செய்கின்றனர்?
ஏன் விவசாயிகளுக்கு இத்தனை ஆண்டுகளாக நெல் உலர்த்தும் இயந்திரம் வாங்கி தரவில்லை. கொள்ளை அடிக்கும் பணத்தில் ஆண்டுக்கு, 10 நெல் உலர்த்தும் இயந்திரங்கள் வாங்கி கொடுக்கலாமே. விவசாயிகள் எதிர்கொள்ளும் ஈரப்பத பிரச்னை, இந்த ஆண்டே இறுதியாக இருக்கட்டும். இவ்வாறு அதில் கூறப்பட்டுள்ளது.