கைவினை தொழிலுக்காக தங்கள் வாழ்க்கையை அர்ப்பணித்த, 65 வயதுக்கு மேற்பட்ட சிறந்த கைவினை கலைஞர்களுக்கு, தமிழக அரசு சார்பில், 'வாழும் கைவினை பொக்கிஷம்' என்ற விருது வழங்கப்படுகிறது.

அதன்படி, 2024 - 25ம் ஆண்டிற்கான விருதுக்கு, கன்னியாகுமரியைச் சேர்ந்த, இயற்கை நார் பொருட்கள் தயாரிப்பாளர் ராணி வின்சென்ட்; தஞ்சாவூரைச் சேர்ந்த உலோக தகட்டு வேலை கலைஞர் வீழிநாதன்; விருதுநகரைச் சேர்ந்த மியூரல் ஓவிய கலைஞர் இளவரசி சொக்கர்; திருவண்ணாமலையைச் சேர்ந்த கற்சிற்ப கலைஞர் குப்பு சுப்பிரமணி; கிருஷ்ணகிரியைச் சேர்ந்த சித்திர தையல் கலைஞர் பூவம்மாள்; சேலத்தைச் சேர்ந்த மர சிற்ப கலைஞர் துரைராஜ் ஆகியோர் தேர்வு செய்யப்பட்டனர்.

அவர்களுக்கு, நேற்று தலைமைச் செயலகத்தில், விருதுக்கான 1 லட்சம் ரூபாய் பரிசுத் தொகை, 8 கிராம் தங்கப் பதக்கம், தாமிர பதக்கம், சான்றிதழ் ஆகியவற்றை முதல்வர் ஸ்டாலின் வழங்கினார்.

அதேபோல், 2024 - 25ம் ஆண்டிற்கான, பூம்புகார் மாநில விருது, 10 கைவினை கலைஞர்களுக்கு வழங்கப்பட்டது.

அவர்களுக்கு விருதுடன், 4 கிராம் தங்கப் பதக்கம், 50,000 ரூபாய் பரிசுத் தொகை, தாமிர பத்திரம், சான்றிதழ் ஆகியவற்றை முதல்வர் வழங்கினார்.

இந்நிகழ்ச்சியில், குறு, சிறு தொழில்கள் துறை அமைச்சர் அன்பரசன், தலைமைச் செயலர் முருகானந்தம், கைத்தறி துறை செயலர் அமுதவல்லி உள்ளிட்டோர் பங்கேற்றனர்.