காஞ்சிபுரம் மாவட்டம், சுங்குவார்சத்திரத்தில் செயல்படும், 'ஸ்ரீசென் பார்மா' நிறுவனத்தில் தயாரிக்கப்பட்ட, 'கோல்ட்ரிப்' இருமல் மருந்து உட்கொண்டு, மத்திய பிரதேசத்தில் 20 குழந்தைகள் உயிரிழந்துள்ளன.

குழந்தைகளின் சிறுநீரக செயழலிப்புக்கு காரணமாக கூறப்படும் இருமல் மருந்தில், பெயின்ட், மை போன்றவை தயாரிக்க பயன்படுத்தப்படும் 'டை எத்திலீன் கிளைசால்' என்ற ரசாயன வேதிப்பொருள் இருந்ததும் கண்டறியப்பட்டது.

இச்சம்பவத்தை தொடர்ந்து, நாடு முழுதும் அம்மருந்து பயன்படுத்த தடை விதிக்கப்பட்டுள்ளது. கோல்ட்ரிப் மருந்து, தமிழகத்தில், 2,000க்கும் மேற்பட்ட பாட்டில்கள், சில்லரை மற்றும் மொத்த விற்பனையகங்களில் இருக்கலாம் என தெரிகிறது.

அம்மருந்துகளை, மக்கள் பயன்படுத்துவதை தவிர்க்கும் வகையில், அவற்றை பறிமுதல் செய்து, சென்னையில் உள்ள மருந்து கட்டுப்பாட்டு அலுவலகத்திற்கு அனுப்பி வைக்கும்படி, மாவட்ட அதிகாரிகளுக்கு உத்தரவிடப்பட்டுள்ளது.

இந்த ஆலை உரிமையாளர் ரங்கநாதனை கைது செய்ய போலீசார் தேடி வந்தனர். இந்நிலையில் இன்று (அக் 09) கோடம்பாக்கத்தில் தங்கியிருந்த கோல்ட்ரிப் உரிமையாளர் ரங்கநாதனை மத்திய பிரதேச போலீசார் கைது செய்தனர்.

சஸ்பெண்ட்

இருமல் மருந்து விவகாரத்தில் மூத்த மருந்து தர ஆய்வாளர்கள் 2 பேர் சஸ்பெண்ட் செய்யப்பட்டுள்ளதாக அமைச்சர் மா.சுப்பிரமணியன் தெரிவித்துள்ளார்.

சென்னையில் செய்தியாளர்களிடம் அவர் கூறியதாவது; ஏற்கனவே கோல்ட் ரீப் என்ற மருந்தில் நச்சுத்தன்மை அதிகமாக இருப்பது கண்டறியப்பட்டது. மத்தியபிரதேசத்தில் இந்த மருந்தை சாப்பிட்டதால் குழந்தைகள் உயிரிழந்தது குறித்து உடனடியாக தமிழக அரசுக்கு தகவல் கொடுக்கப்பட்டது. அதன்பேரில், உடனடியாக ஆய்வு செய்து, இந்த மருந்தில் நச்சுத்தன்மை இருப்பதை உறுதி செய்து, மத்திய பிரதேசம், ஒடிசா, புதுச்சேரி மற்றும் மத்திய அரசுக்கு தகவல் அளிக்கப்பட்டது.

ஆனால், மத்திய அரசும், மத்திய பிரதேச அரசும் இந்த மருந்தில் தவறு இல்லை என்று கூறி விட்டு விட்டார்கள். ஆனால், தமிழகத்தில் அக்., 3ம் தேதி முதல் இந்த மருந்துக்கு தடை விதிக்கப்பட்டது. மேலும், அதன் உற்பத்தியையும் தடுத்து நிறுத்தினோம். இது தொடர்பாக குற்ற நடவடிக்கை எடுக்கப்பட்டது. அந்த மருந்து ஆலையின் உரிமையாளர் ஆலையில் நோட்டீஸ் ஒட்டப்பட்டது. இதனிடையே, மருந்து ஆலை உரிமையாளர் நேற்று கைது செய்யப்பட்டுள்ளார்.

அவரிடம் நடத்தப்படும் விசாரணையின் அடிப்படையில், சம்பந்தப்பட்ட மருந்து உற்பத்தி ஆலை மூடப்படும். இது தொடர்பாக ஆலோசனை நடத்தி முடிவெடுக்கப்படும். இருமல் மருந்து விவகாரத்தில் மூத்த மருந்து தர ஆய்வாளர்கள் 2 பேர் சஸ்பெண்ட் செய்யப்பட்டுள்ளனர்.கடந்த இரு ஆண்டுகளாக மருந்தின் தரத்தை அவர்கள் ஆய்வு செய்யவில்லை என்ற அடிப்படையின் கீழ் நடவடிக்கை எடுக்கப்பட்டுள்ளது.

தமிழகம் கொடுத்த எச்சரிக்கையினால் பிற மாநிலங்களில் நிகழவிருந்த அசம்பாவிதங்கள் தடுக்கப்பட்டிருக்கிறது, என்றார்.