பத்திரிகை செய்தி:

தற்போது, ஆம் ஆத்மியில், அரவிந்த் கெஜ்ரிவாலுக்கும், கட்சியின் நிறுவன தலைவர்களான யோகேந்திர யாதவ் மற்றும் பிரசாந்த் பூஷன் இடையே மோதல் உருவாகி உள்ளதாக, பத்திரிகைகளில் செய்தி வெளியாகி உள்ளது. ஆனால், 'இந்தக் குற்றச்சாட்டுக்கள் ஆதாரமற்றவை' என, யோகேந்திர யாதவ் கூறியுள்ளார். அவர் கூறியதாவது: பத்திரிகைகளில் வந்துள்ள செய்திகளைப் பார்க்கும் போது, சில நேரங்களில் எனக்கு சிரிப்பு வருகிறது; சில நேரங்களில் அதிருப்தி அடைகிறேன். டில்லியில் மாபெரும் வெற்றி பெற்ற பின், கட்சியில் சின்ன சின்ன பிரச்னைகளை எல்லாம் ஓரங்கட்டி விட்டு, பெரிய மனதுடன் பணியாற்ற வேண்டியது அவசியம். அப்படிப்பட்ட சூழ்நிலையில், கட்சியில் தலைவர்கள் இடையே மோதல் நிலவுவதாக, கற்பனை கலந்து வெளியிடப்படும் செய்திகளால், வருத்தம் அடைகிறேன். இவ்வாறு, யோகேந்திர யாதவ் கூறினார்.

அவர் கூறியதாவது:

கட்சியில் தலைவர்கள் இடையே, கருத்து வேறுபாடுகள் உள்ளன என்பதெல்லாம், உள்கட்சி விவகாரம். அதுபற்றி பகிரங்கமாக விவாதிக்க முடியாது. கட்சியில் அமைப்பு ரீதியான மாற்றங்களை கொண்டு வர வேண்டும் என, தேசிய செயற்குழுவுக்கு கடிதம் எழுதி உள்ளேன். இப்படிச் சொல்வதை, கட்சியில் புரட்சி செய்வதாக சொல்ல முடியாது. இவ்வாறு, பிரசாந்த் பூஷன் கூறினார். அதேநேரத்தில், ஆம் ஆத்மி தகவல் தொடர்பாளரான அஷுதோஷ், கட்சியில் தலைவர்கள் இடையே மோதல் இருப்பதை உறுதி செய்துள்ளார். சமூக வலைதளத்தில் உள்ள தன் வலைப்பக்கத்தில், 'ஆம் ஆத்மியில் சில குழப்பங்கள் உள்ளன. அது, தனிப்பட்ட நபர்கள் இடையேயான மோதல் அல்ல; கருத்து மோதல்களே. இதனால், ஆம் ஆத்மியின் எதிர்கால அரசியலில் மாற்றங்கள் உருவாகும்' என, தெரிவித்துள்ளார். அரசியல் கமிட்டி இந்தச் சூழ்நிலையில், ஆம் ஆத்மியின் செயற்குழு கூட்டம் நாளை நடைபெற உள்ளது. இந்தக் கூட்டத்தில், யோகேந்திர யாதவ் மற்றும் பிரசாந்த் பூஷன் ஆகியோர், கட்சியின் தேசிய செயற்குழு மற்றும் அரசியல் விவகார கமிட்டியில் இருந்து நீக்கப்படலாம். அப்படி நீக்கப்பட்டால், ஆம் ஆத்மியிலிருந்து ஏற்கனவே வெளியேறிய, 'அவாம்' அமைப்பினருடன் சேர்ந்து, அவர்கள் புதிய கட்சி துவக்குவதற்கான வாய்ப்புகள் உள்ளதாகவும் கூறப்படுகிறது.

கட்சி பதவியிலிருந்து கெஜ்ரிவாலை நீக்க சதி:

ஆம் ஆத்மி கட்சியின் மூத்த தலைவர்களில் ஒருவரான சஞ்சய் சிங் நேற்று கூறியதாவது: கட்சியில் உள்ள சிலரும், மூத்த தலைவர்கள் சிலரும், ஆம் ஆத்மியின் தேசிய அமைப்பாளர் பதவியில் இருந்து, அரவிந்த் கெஜ்ரிவாலை நீக்க முயற்சிக்கின்றனர். அத்துடன் கட்சிக்கு களங்கம் ஏற்படுத்தும் செயலிலும் ஈடுபட்டுள்ளனர். கட்சியின் மூத்த தலைவர்கள் சிலர் வெளியிட்டுள்ள அறிக்கையும், அவர்கள் எழுதியுள்ள கடிதங்களும், கட்சியின் செயல்பாடுகளை கேலிக்கூத்தாக்குவது போல உள்ளது. அவர்களின் செயல்பாடுகளும், எங்களுக்கு நகைப்பை ஏற்படுத்துகின்றன. ஆம் ஆத்மி கட்சியின் செயற்குழு கூட்டம் நாளை நடைபெற உள்ளது. அப்போது, கட்சியில் உருவாகி உள்ள கருத்து வேறுபாடுகள் உட்பட, அனைத்துப் பிரச்னைகள் குறித்தும் விவாதிக்கப்படும். அதேநேரத்தில், கட்சியிலிருந்து மூத்த தலைவர்கள் யாரும் நீக்கப்படுவார்களா என்பதற்கெல்லாம், நான் பதில் அளிக்க முடியாது. கட்சியின் தேசிய செயற்குழு கூட்டம், கடந்த வாரமும் நடைபெற்றது. அப்போது, ஆம் ஆத்மியின் தேசிய அமைப்பாளர் பதவியில் இருந்து விலகுவதாக, அரவிந்த் கெஜ்ரிவால் கடிதம் கொடுத்தார். ஆனால், கூட்டத்தில் பங்கேற்ற உறுப்பினர்கள், அதை ஏற்க மறுத்து விட்டனர். எனவே, கட்சியின் தலைவராக அவரே தொடர்வார். அவரை நீக்குவது என்ற பேச்சுக்கே இடமில்லை. இவ்வாறு, சிங் கூறினார்.

வெளியேறியவர்களுக்கு ஆதரவு தந்த பிரசாந்த் பூஷன்:

ஆம் ஆத்மியின் மற்றொரு தலைவரான திலிப் பாண்டே கூறியுள்ளதாவது: அரவிந்த் கெஜ்ரிவாலின் ஆம் ஆத்மி கட்சியிலிருந்து முன்னர் வெளியேறிய சிலர், 'ஆம் ஆத்மி தன்னார்வலர்கள் முன்னணி (அவாம்)' என்ற அமைப்பை உருவாக்கினர். இந்த அமைப்பினருக்கு, ஆம் ஆத்மியின் மூத்த தலைவர்களான பிரசாந்த் பூஷன், அவரின் தந்தை சாந்தி பூஷன் மற்றும் யோகேந்திர யாதவ் ஆகியோர் பல வகையிலும் உதவி புரிந்துள்ளனர். அவர்களுக்கு சட்ட உதவி உட்பட, பலவிதமான உதவிகளையும் வழங்கி உள்ளனர். ஆம் ஆத்மிக்கு எதிராக செயல்படும்படியும் தூண்டி உள்ளனர். அதற்கான ஆதாரங்கள் கெஜ்ரிவாலிடம் உள்ளன. 'அவாம்' அமைப்பின் உறுப்பினர்கள், அடிக்கடி இந்த மூன்று தலைவர்களையும் சந்தித்துள்ளனர். அவாம் அமைப்பை துவக்கியவர் கரண் சிங். முதல்வர் அரவிந்த் கெஜ்ரிவால், முறைகேடான வழிகளில், கட்சிக்கு நன்கொடைகளை பெற்றுள்ளார் என, இந்த அமைப்பினர் தான், தேர்தல் ஆணையத்திடம் சமீபத்தில் புகார் அளித்தனர். இதன்மூலம், கட்சிக்கு விரோதமாக பிரசாந்த் பூஷன், சாந்தி பூஷன், யோகேந்திர யாதவ் ஆகியோர் செயல்பட்டுள்ளது தெளிவாகிறது. இவ்வாறு, திலிப் பாண்டே கூறினார்.

பிரச்னைக்கு காரணம் என்ன?

ஆம் ஆத்மியின் மூத்த தலைவரான பிரசாந்த் பூஷன், கட்சியின் தேசிய செயற்குழுவுக்கு, சமீபத்தில் கடிதம் ஒன்றை எழுதி உள்ளார். அந்தக் கடிதத்தில், அவர் கூறியுள்ளதாவது: கட்சியில் ஒளிவுமறைவற்ற செயல்பாடுகள் இல்லை. ஒரே நபரை மையமாக வைத்து, டில்லி தேர்தலின் போது, பிரசாரம் செய்யப்பட்டது சரியானதல்ல. இது, மற்ற கட்சிகளைப் போல, ஆம் ஆத்மியை மாற்றி விட்டது. எனவே, கட்சியில் ஜனநாயக ரீதியான செயல்பாடுகளை அதிகரிக்க வேண்டும். ஒரே நபரின் கட்டுப்பாட்டில் கட்சி செயல்படுவது தவிர்க்கப்பட வேண்டும். இவ்வாறு, அவர் கடிதத்தில் கூறியுள்ளார். இதுவே, உட்கட்சி பூசலுக்கு காரணம் என, கூறப்படுகிறது.