ADDED : மே 14, 2018 10:26 AM

சென்னை: கர்நாடக சட்டசபைக்குத் தேர்தல் முடிந்திருக்கிறது. அடுத்ததாக, தமிழகத்தில் பா.ஜ.,வை வளர்க்க, பா.ஜ., தேசியத் தலைவர் அமித்ஷா களம் இறங்கி உள்ளதாகக் கூறப்படுகிறது. இது குறித்து, தமிழக பா.ஜ., தலைவர்கள் சிலரிடம் அமித் ஷா பேசத் துவங்கி இருக்கிறார்.
தமிழக பா.ஜ., தலைவர்கள் சிலர் கூறியதாவது:
தமிழகத்தில், பா.ஜ.,வை வேகமாக வளர்க்க வேண்டும் என்ற முயற்சியில், அகில இந்திய பா.ஜ., வேகமாக களம் இறங்கும் என, ஏற்கனவே சொல்லப்பட்டிருந்தது. அதை ஊர்ஜிதப்படுத்துவது போல, கர்நாடக தேர்தல் முடிவுகள் வருவதற்கு முன்பாகவே, கட்சி தேசியத் தலைவர் அமித்ஷா களம் இறங்கி விட்டார். விரைவில் தமிழகம் வந்து, கட்சி தலைவர்கள் பலரையும் சந்தித்து, கட்சி வளர்ப்புப் பணிக்காக அசைன்மெண்ட் கொடுக்கத் தயாராகி இருக்கும் அமித்ஷா, முன்னோட்டமாக தமிழக பா.ஜ., தலைவர்களிடம் பேசியிருக்கிறார்.
தமிழகத்தில் பா.ஜ.,வை வளர்க்க இதுவரை ஒவ்வொரு தலைவரும் திரட்டி வைத்திருக்கும் தகவல்களை, நேரடியாக அனுப்பி வைக்குமாறு கோரியிருக்கிறார். அப்படி வரும் தகவல்களை வைத்து, கட்சியை வளர்க்கும் முயற்சியில் ஈடுபடப் போவதாகவும் தெரிவித்துள்ளார். இவ்வாறு அந்தத் தலைவர்கள் கூறினர்.
