காங்., பொதுச் செயலர் திக்விஜய் சிங் கூறியுள்ளதாவது:குஜராத் முதல்வரும், பா.ஜ., பிரதமர் வேட்பாளருமான நரேந்திர மோடி, காங்., தலைமையிலான, மத்திய அரசை, கடுமையாக விமர்சித்துள்ளார். பா.ஜ., தலைமையிலான, தே.ஜ., கூட்டணி ஆட்சியில், அதிகமான வளர்ச்சி திட்டங்கள் மேற்கொள்ளப்பட்டதாக கூறியுள்ளார்.

இது தொடர்பாக, அவர் அளித்துள்ள புள்ளி விவரங்கள் அனைத்தும் தவறானவை. காங்., தலைமையிலான மத்திய அரசு, அனைத்து துறைகளிலும், தோல்வி அடைந்து விட்டதாக, அவர் கூறியுள்ளார். இது குறித்து, காங்., தலைவர்களில், யாராவது ஒருவருடன், விவாதிக்க, அவர் தயாரா?காங்கிரஸ், நாட்டு மக்களுக்கு அதிகாரம் அளிக்கும் கட்சி. ஆனால், மோடி, தனக்கு மட்டுமே, அதிகாரம் கிடைக்க வேண்டும் என, நினைப்பவர். பா.ஜ., ஆட்சி நடக்கும் மாநிலங்களில், ஊழல் நடக்கவில்லை என, அவர் கூறியுள்ளது, ஆச்சர்யம் அளிக்கிறது. பா.ஜ., ஆளும் மாநிலங்களில் நடந்த பல ஊழல்கள், 'ஸ்டிங் ஆபரேஷன்' மூலம், வெளிச்சத்துக்கு வந்துள்ளன.இவ்வாறு, திக்விஜய் சிங் கூறியுள்ளார்.