சென்னை, அடையாறு குமாரராஜா முத்தையா மேல்நிலைப் பள்ளியில், நேற்று நடந்த அரசு நிகழ்ச்சியில் பங்கேற்பதற்காக, பள்ளிக்கல்வித் துறை அமைச்சர் மகேஷ் சென்றார். அப்போது, அடையாறு காந்தி நகரில் உள்ள, குமாரராணி மீனா முத்தையா மெட்ரிக் மேல்நிலைப் பள்ளியில் பயிலும் மாணவியரின் பெற்றோர், அவர் காரை வழி மறித்தனர்.

காரிலிருந்து இறங்கிய அமைச்சர் மகேஷிடம், ' மெட்ரிக் பள்ளியை இடிக்க போகிறோம். மாணவி யரை வேறு பள்ளியில் சேர்த்துக்கொள்ளுங்கள் என, பள்ளி நிர்வாகம் கூறிவிட்டது. தங்கள் பிள்ளைகளின் படிப்பை பாதுகாக்க வேண்டும்' என, கோரிக்கை வைத்தனர்.

அப்போது, 'பள்ளி விவகாரம் குறித்து எம்.எல்.ஏ., ஹசன் மவுலானா, சட்டசபையில் தெரிவித்தார். அப்படி ஏதும் நடக்காது என, பதில் அளித்துள்ளேன். பள்ளி முதல்வரிடம் பேசிவிட்டு சொல்கிறேன்' என கூறிவிட்டு சென்றார்.

பின், நிகழ்ச்சி முடிந்து திரும்பியபோதும், பெற்றோர் அவரை பின் தொடர்ந்தனர். அப்போது, 'முதல்வரிடம் போய் பேசுங்கள்' எனக்கூறிவிட்டு சென்றார்.

இதுகுறித்து, பெற்றோர் கூறியதாவது: அரசு உதவிபெறும் பள்ளியாக உள்ள குமாரராணி மீனா முத்தையா மெட்ரிக் மேல்நிலைப் பள்ளியை மூடிவிட்டு, சி.பி.எஸ்.இ., பள்ளியாக மாற்ற நிர்வாகம் நடவடிக்கை எடுப்பதாக தகவல் வெளியாகி உள்ளது. அதற்கேற்ப, எங்கள் பிள்ளைகளை வேறு பள்ளிகளில் சேர்க்கும்படி, பள்ளி நிர்வாகம் கூறிவிட்டது.

இதை எதிர்த்து போராட்டங்கள் நடத்தியும் எந்த பலனும் இல்லை. இதுகுறித்து, அமைச்சரிடம் தெரிவித்தோம். அவர், முதல்வரிடம் பேசுவதாக கூறினார். மீண்டும், பள்ளி நிர்வாகத்தை தொடர்பு கொண்டு கேட்டோம். அவர்கள், நிர்வாகம் எடுக்கும் முடிவில் எந்த மாற்றமும் இல்லை என்கின்றனர்.

மிகக்குறுகிய கால இடைவெளியில் பள்ளியை மூடப் போவதாக தெரிவித்தால், நாங்கள் எந்த பள்ளியில் சேர்க்க முடியும். அரசு பள்ளிகளில் சேர்த்துக்கொள்ளுங்கள் என்கின்றனர். அமைச்சரை சந்தித்து முறையிட்டும், அவர் கைவிரித்து விட்டது அதிர்ச்சியாக உள்ளது. இவ்வாறு அவர்கள் கூறினர்.