சென்னை கிண்டியை தலைமை இடமாக வைத்து, ஐ.எப்.எஸ்., என்ற நிதி நிறுவனம் செயல்பட்டு வந்தது. இதை, வேலுாரை சேர்ந்த லட்சுமி நாராயணன், வேதநாராயணன், மோகன்பாபு, ஜனார்த்தனன் என, நான்கு சகோதரர்கள் நடத்தி வந்தனர்.

முதலீட்டாளர்களுக்கு அதிக வட்டி தருவதாகக் கூறி, 5,322 பேரிடம் இருந்து, 828 கோடி ரூபாய் மோசடி செய்துள்ளனர். இதுகுறித்து, பொருளாதார குற்றப்பிரிவு போலீசார் வழக்குப்பதிவு செய்து கைது நடவடிக்கையில் ஈடுபட்டு வருகின்றனர்.

2 நாள் காவல் சில தினங்களுக்கு முன், வெளிநாட்டில் இருந்து சென்னை திரும்பிய வேதநாராயணன், 48, கைது செய்யப்பட்டார். அவரை இரண்டு நாள் காவலில் எடுத்து விசாரித்தனர்.

அவர் அளித்த வாக்குமூலம் அடிப்படையில், ஐ.எப்.எஸ்., நிதி நிறுவனம் மற்றும் அதன் இயக்குநர்கள் பெயரில் வாங்கப்பட்டுள்ள சொத்துக்களை அடையாளம் காணும் பணியில் போலீசார் ஈடுபட்டுள்ளனர்.

இதுகுறித்து, பொருளாதார குற்றப்பிரிவு போலீசார் கூறியதாவது:

ஐ.எப்.எஸ்., நிதி நிறுவனம், 84,000 பேரிடம், 5,900 கோடி ரூபாய் வரை மோசடி செய்திருக்கலாம் என, தெரிய வருகிறது.

இதுகுறித்து, வேதநாராயணனிடம் விசாரித்ததில், பல தகவல்கள் திரட்டப்பட்டு உள்ளன. அவரது சகோதரர்கள், எந்த நாட்டில் பதுங்கி உள்ளனர் என்ற கேள்விக்கு, தனக்கு தெரியாது என்று கூறி விட்டார்.

ஐ.எப்.எஸ்., நிதி நிறுவனத்தில், லட்சுமிநாராயணன் மற்றும் அவரது சகோதரர்களை சேர்த்து, 10 பேர் இயக்குநர்களாக செயல்பட்டுள்ளனர். அவர்கள் வேலுார் உள்ளிட்ட இடங்களில் சொத்துக்கள் வாங்கி இருப்பதும் தெரிய வந்துள்ளது.

கார்கள் பறிமுதல் பண மோசடிக்கு, 791 வங்கி கணக்குகளையும் பயன் படுத்தி உள்ளனர். மொத்தம், 38.49 கோடி ரூபாய்க்கு, 54 வகையான அசையா சொத்துக்களை வாங்கி இருப்பதாகவும் வேத நாராயணன் தெரிவித்தார்.

அந்த சொத்துக்களை அடையாளம் காணும் பணி நடக்கிறது. ஐ.எப்.எஸ்., நிறுவனத்தில் பயன்படுத்தப்பட 18 கார்களும் பறிமுதல் செய்யப்பட்டுள்ளன.

இவ்வாறு அவர்கள் கூறினர்.