உலகளாவிய ஆயத்த ஆடை ஏற்றுமதி வர்த்தகத்தில், நம்நாடு நான்காவது இடத்தில் இருக்கிறது.

நடப்பு நிதியாண்டில், ஏப்ரல் முதல் ஆகஸ்டு வரை, ஐந்து மாத ஏற்றுமதியில், அமெரிக்கா மட்டும் 18,121 கோடி ரூபாய் பங்கு வகிக்கிறது.

பிரிட்டனுடன் 4,861 கோடி ரூபாய்; ஐக்கிய அரபு நாடுகளுடன் 3,789 கோடி ரூபாய்க்கு ஏற்றுமதி நடந்துள்ளது.

ஜெர்மனி, ஸ்பெயின், நெதர்லாந்து, பிரான்ஸ், சவுதி அரேபியா, இத்தாலி, ஆஸ்திரேலியா ஆகியன அடுத்தடுத்து 'டாப் -10' ஆடை இறக்குமதி நாடுகளாக உள்ளன. தடையற்ற வர்த்தக ஒப்பந்தம் செய்துள்ள ஐக்கிய அரபு நாடுகளும், ஆஸ்திரேலியாவும் பட்டியலில் இடம் பெற்றுள்ளன.

இதே காலகட்டத்தில், 50,097 கோடி ரூபாய்க்கு ஏற்றுமதி நடந்துள்ளதாக, மத்திய ஜவுளித்துறை அமைச்சகம் தெரிவித்துள்ளது.