பழநி திருஆவினன்குடி குழந்தை வேலாயுத சுவாமி கோயில் அர்த்தமண்டப வாயிலில் இரட்டை மரக்கதவு, நிலை வாசலில் வெள்ளித்தகடுகள் பல ஆண்டுகளுக்கு முன் பதிக்கப்பட்டு தற்போது பழுதடைந்துள்ளது. தற்போது கோயில் கும்பாபிஷேக பணிகள் நடக்கின்றன. இந்நிலையில் அர்த்தமண்டப நிலை வாசல், மரக்கதவுகளில் பதிக்கப்பட்ட வெள்ளி தகடுகளை புனரமைக்கும் பணி அக்.,9ல் துவங்கியது.

பழைய வெள்ளித் தகடுகள் அகற்றப்பட்டன. அப்போது கதவின் மரம் பழுதுபட்டிருந்தது. அதனை சரி செய்து புதிய கதவு உருவாக்கப்பட்டு அதில் ரூ.25 லட்சம் மதிப்பிலான 12 கிலோ வெள்ளியை பயன்படுத்தி தகடுகள் பதிக்கப்பட்டன. இந்த வெள்ளியை கரூரைச் சேர்ந்த முருக பத்தர் ஒருவர் வழங்கினார்.

நேற்று அதிகாலை 4:00 மணிக்கு விளா பூஜை நடந்தது. புணராவாஹனம் செய்யப்பட்டு, கலசநீரை சன்னதி பிரகாரத்தில் எடுத்து வநதுத புதிய வெள்ளி கதவுக்கு பூஜைகள் நடந்தன. பின் வெள்ளிக்கதவு திறக்கப்பட்டு சன்னதிக்குள் இருந்த குழந்தை வேலாயுதசுவாமி, சந்திரமவுலீஸ்வரர், சாரதாம்பாளுக்கு அபிஷேகம், அலங்காரம், தீபாராதனை நடந்தன.

கோயில் இணை கமிஷனர் மாரிமுத்துவிடம் வெள்ளிக்கதவின் சாவி வழங்கப்பட்டது.